股海實戰：新創建吸引力有限

港股前日反彈逾七百點後，尋日又再發軟蹄。令人感到極度不安嘅係，尋日大市沽空額達到95.5億元，沽空比率達13%，騰訊（00700）沽空額急增至6.5億元，周初阿莊話班空軍注碼愈玩愈大，真係冇花冇假！

點解阿莊斷言空軍冇收斂，主要係早前同一班專做對沖基金嘅朋友聚會，見佢哋一聚首就分析仲有咩沽空對象，除咗加沽內地金融股外，仲將焦點轉移至估值仍相對高企嘅內需股，見到尋日國美（00493）沽空額達2.29億元，睇嚟真係冇收錯料！

民間借貸恐防爆煲

事實上，今年對沖基金表現要跑贏大市，除咗一味靠「沽」之外，亦別無他法。股市表現一向走先於經濟，目前嘅境況已預示未來一年經濟只會愈來愈差，阿莊再次奉勸各位要珍惜「銀彈」，盡量忍手，記得四個大字：「現金為王」。組合中瑞聲（02018）尋日再升逾半成，會把握機會沽貨套現。

除咗空軍肆虐之外，近日魚缸熱門話題係內地民間借貸問題。今年以來內地一直收緊銀根，銀行大量存款無出路，結合中小型企業「錢荒」，造就民間借貸市場嘅興起，除咗提取存款放貸之外，唔少富戶更將名下物業抵押予銀行套現放貸。近日內地調查顯示，單係浙江溫州，民間借貸市場規模便超過一千億元人仔，估計全國規模達到兩萬億元人仔！接近末季，民企老闆無法償貸而「出逃」嘅個案正在增加，當局如何收拾殘局？最終會否拖累內銀及內房市場？投資者必須有所防範。

全年賺46億升15%

講完咁多負面嘢，又睇番吓企業訊息。新創建（00659）截至六月底止全年收入跌近21%，至95.6億元；純利升15%至46.26億元，派末期息0.33元，當中包括投資物業重估公平值收益4.79億元，及出售收益3.43億元，整體表現略勝預期。

新創建旗下嘅基建業務涉及內地道路、內地能源、水務、港口及物流，而服務業務則包括設施管理、建築及交通等多個領域，策略投資包括金融、礦產等，屬業務多元化嘅綜合性企業。綜企特點係旺市時股價表現不及從事單一業務嘅當炒股，而跌市時股價抗跌力取決於市帳率同息率，以新創建現價市帳率1.12倍、往績市盈率7.5倍、息率6.6厘，估值唔係貴，但考慮到內地道路尚存政策風險、建築業務毛利受壓、環球經濟不景令港口及物流業務增添變數，估值亦唔算特別便宜，與其買呢隻綜企股，倒不如直接揸隻純基建股或公用股仲實際。