工商舖交投靜到年尾

生意人成日有句口頭禪，就係「五窮、六絕、七翻身」，點知一場環球小股災，令到八、九月個樓市靜晒，就連唔受額外印花稅影響嘅工商舖物業，亦難逃此劫，今季全部工商舖物業買賣價、量齊齊按季插水。不過，紀惠集團舵手之一嘅湯文亮同劉SIR講，下一季市況仍然「牛皮」，價、量好難有突破，惟有寄望銀行出年重新訂出全年按揭計劃，積極承做按揭，工商舖成交先有機多番。

紀惠集團行政總裁湯文亮話，近幾個月銀行按揭審批愈來愈手緊，部分寫字樓物業嘅按揭批出成數，甚至五成都無，買家有心無力，且優質商廈業主好多都唔急賣，鮮有劈價求售，所以買賣兩閒。佢預期，呢季工商舖買賣成交按季變化唔大，商廈市場好彩有用家幫手撐住，加上商廈租金逆市向好，料做價可以企穩，至於工廈同埋店舖個價睇怕會有少少下調壓力。

不過，美聯工商舖行政總裁黃子華就認為，由於股票市場短期仍然大上大落，投資者為咗避險，相信都會諗吓將部分嘅錢投入物業市場，佢預期工商舖物業買賣成交最快下季慢慢回升，惟交投量未必能及今年首季及次季水平。

商廈買賣表現最差

事實上，近幾個月工商舖買賣真係好靜。睇番市場嘅最新資訊，估計本季工商舖物業買賣只有大約3,056宗，總額約252億多元，兩數字齊齊按季插水約37%，其中成交宗數更創○九年次季後新低。而喺各類物業中，商廈嘅表現最令人失望，估計本季成交量600宗都唔夠，金額更加只有約近78億元，兩數字均按季少42%。