短炒倉:超威 返回起步位
乜嘢係恐慌性拋售,睇到尋日港股中段時嘅市況,應該都可以領略一二。近排變得冇咁神嘅股神巴菲特話,別人恐懼時你要識貪婪,但對我哋呢啲凡人嚟講,能做到別人恐懼時自己唔會更恐懼,已經係唔容易,總之少做少錯,食少多覺瞓。
閒來無事,睇番一啲之前留意過嘅股票,當係update一下狀況,睇見四月時曾推介過嘅超威動力(00951),由當日3元左右一直炒至上月高見5.02元,踏入九月份開始急轉直下,尋日收3.2元,幾乎打回原形。
基本因素仍穩健
集團係內地電動自行車用鉛酸動力電池龍頭,既受惠「十二五」政策,而中央大力整頓行業,有助提高其市佔率之餘,亦令鉛酸電池價格上升,集團今年中期純利升18.8%,至1.42億元人民幣,毛利率更從去年同期嘅26.6%升至超過三成,加上鉛價近期又暴跌,有利降低成本,論基本因素,超威其實同幾個月前冇乜分別,甚至可以話比之前更好。不過,若然你問我係咪即係買得過,呢個問題……都係等3元樓下至講啦……。
超威動力(00951)
阻力位:3.5元
支持位:2.8元