Fundman睇市：平保不宜賤價求售

上星期，歐美股市通通先急挫後反彈，走勢派話，出現「倒轉錘頭」屬利好徵兆，點知港股尋日早市叻得一陣，最多升66點，去到17,734點已經行人止步，明顯地，港股已經變咗基金應付贖回套現的提款機，而且在投資者恐懼戰勝理智下，任何技術分析準確度都大幅降低。

近期市況波動到離晒譜，八、九月賭升賭跌的對沖基金，據知唔少輸到嘔，近兩星期已奉行少做少錯策略。尋日缸邊消息話，有個以長線投資馳名的長倉基金，終於都按捺不住，清貨大平賣狂隊幾隻內險及內銀股，而尋日收市後，據聞亦有幾個長倉基金要同歐洲及北美總部開會，商量對策。睇怕縱使大市未到終極一跌，都已經接近短期低位。

超大未定罪先處刑

跌市中，壞消息好似武俠小說中的高手般殺人不見血，超大現代（00682）被調查行為失當，未定罪先被投資者「處決」，中午停牌前已瀉0.4元或者26.6%，收報1.1元，假如去年盤數無問題，股價比每股盈利1.36元仲要低，市盈率一倍都唔到，得0.81倍，證明市盈率低同值唔值得投資已經無關係！好奇㩒㩒彭博資訊，顯示十七大股東揸住超大七成二股票，大名鼎鼎的德銀、貝萊德揸10%樓上，瑞銀、大摩及Janus Capital都有6至8%，可見輸起上嚟，即使機構投資者都唔見得比散戶機警。

雨潤（01068）發第三季盈警，令股價急插近31%，收報7.51元。睇番上半年雨潤賺16.1億，增長22.9%，即使下半年真係一毫子都賺唔到，以137億市值，講緊亦只係8.5倍市盈率！股價見底未？只有天知，假如不涉及帳目問題，兼且唔係衰到下半年由賺變蝕，咁嘅估值都真係平得幾誇張吓。

重災股中的XO，平保（02318）跌得厲害，最低見41.75元，比上周五收市49.25元最多跌一成五或者7.5元，謠言滿天飛，一陣話彤叔及滙控（00005）沽貨，連投資早已全數撥備的富通爆發財務危機，居然都仲關平保事，講到底，上個月平保在62至68元水平，累積唔少沽空，趁國壽（02628）已經得番半條人命，淡友終於向平保開刀。話時話，平保尋日仲有470萬股沽空，差不多等於上星期四、五兩日沽空總和，到底沽出這470萬空倉的想贏幾多？筆者甚有興趣知道。

平保股價已跌到○九年三月水平，由圖表顯示，向下的重要支持分別係30至34元，會唔會跌到咁低？睇今日愈來愈多基金經理都係靠沽空少數估值高於大市的股票搵食，真係咩都有可能發生。上半年平保業績仲算唔錯，賺127.5億元（人民幣．下同），增長32.7%，目前綜合街外分析員估全年都係賺212.1億元，即係下半年得84億元左右，比上半年倒退近三分一，市盈率都係12.3倍。

早前史提芬講過要避開內險股，因為借保險公司這跳板投資A股的溢價，在內地股市表現不濟下正全速流失，今次調整的速度比預期來得更快，平保短短一季已經由高位跌近五成，開始進入合理範圍。鑑於累積沽空不少，或者平保股價還會被踩多兩腳，但嚟到40港元附近，筆者認為揸貨者不宜賤價求售。