股海實戰：阿里巴巴未係撈底時候

金魚缸秋季大減價，價格一減再減，家電、汽車、金飾、豬肉全線大平賣！股票貴一貴都有人追，平一平都冇人敢買，當今的市況正好用來說明呢個魚缸定律！

本來唔少鑊鏟友諗住周初可乘基金季結之便落場入市博反彈，點知尋日恒指上到17,734點就掉頭回落，市傳有發行商午後初段順勢踩多一腳，咁啱恒指又真係輕微插穿萬七點關（低位16,999點），強制收回二十幾隻恒指牛證，就止跌反彈，結果收報17,407點，跌261點，成交793億元，全日沽空75億元。

尋日市場確有消息指，有個別傳統基金落場大舉沽貨套現，準備應付贖回，所以見到唔少大市值股份股價承受頗大沽壓，好似隻平保（02318），一度跌至41.75元，單日市值唔見逾兩百億元，另阿莊早已經話唔好亂溝貨嘅內銀股，股價愈跌愈殘，農行（01288）話咁快跌到落2.6元水平，招行（03968）落番12元邊，長期捧場客都要一殼眼淚！

離場觀望最實際

上周阿莊引述內地股友話，A股滬綜指點都要穿一穿2,400點，真係開口中，尋日滬綜指收報2,393點，跌39點。阿莊認為，近日全球金、股、匯三市齊挫，正在預先反映希債將會違約，究竟該國能否順利爭取新援助，後果可大可小，並將繼續主宰後市升跌，喺睇清楚局面前，離場觀望係最自保。

個股方面，阿里巴巴（01688）宣布正尋求分拆HiChina在美國獨立上市，HiChina為互聯網基礎設施服務供應商，向內地中小企提供域名服務、傳統網站託管服務、雲端服務及網站建設解決方案，以協助其客戶建立網上平台並進行商務交易。不過，擬分拆業務嘅消息未能令公司股價避過一跌，相反，尋日再創52周新低6.39元，收報6.42元，跌8%，成交7,183萬元。

市場一直有指，阿里巴巴擬重組及分拆業務，甚而其母公司正謀整體上市，但其實呢啲係長遠目標，以目前嘅股市氣氛，顯然亦非適當評估呢啲大動作嘅可能性。再聚焦眼前，未來數月全球宏觀經濟不明朗因素揮之不去，嚴重打擊出口業，加上內地市場流通性未有改善迹象，中小企信貸問題將會惡化，公司將面臨會員增長放緩及交易量下跌的壓力，目前嘅估值（往績市盈率18倍、市帳率4.7倍）尚有下調壓力，故結論係─目前尚遠未到撈底嘅時候！