屯門盤5厘回報爭住要

股市繼續冧，有樓業主劈價掟貨，在低息及高通脹環境持續下，刺激收租客再次出動，買「磚頭」收租，而事實上，買樓比買股買金更穩陣；劉SIR啱啱聽到屯門代理老友講，區內單幢樓文翔大廈，有資深收租客以345.6萬元連掃3伙，全部都低市價3%，租金回報近5厘。

中原趙松坡同劉SIR講，屯門青桃徑文翔大廈鄰近輕鐵站，升值潛力不俗，一個已經持有多伙收租嘅投資者，睇準同區樓價仍然徘徊喺100萬元左右，於是以總共345.6萬元，一口氣掃入該廈低層同層A、C及E室3伙，面積由437至545方呎，平均呎價2,362元，低市價3%。

聽講文翔大廈唔少單位由同一業主持有，大多作收租用途，未聞曾拆售單位，故該大廈甚少有二手成交。

康德撻訂貨照賣172萬

如果附近同面積400至500方呎住宅單位相比，現時市價要130至140萬元，而用同類市值月租5,000元計數，單位回報可以去到近5厘。

唔少代理講，近排收租客亦蠢蠢欲動，搵筍盤務求有「穩陣」回報，美聯高文帆話，屯門康德花園1座高層單位，上周才因按揭問題被買家撻訂，兩日後即再被買家以相同172萬元買入收租，原業主多賺3萬元訂金；而以市值月租6,500元計，回報逾4.5厘。

外區客平8%購好順泰

新界細價樓入場門檻不高，向是收租客搶購首選，有代理指出，有一名來自外區嘅「過江龍」，看好元朗後市，加上業主肯減價，即時以126萬元購入好順泰大廈B座低層339方呎園景戶，低市價8%，接近九七年購入價。