Fundman睇市：宏利博反彈諗過先

有十幾年股齡的股民，經歷過九七年亞洲金融風暴、二千年科網熱爆破、○七年美國次按海嘯後，應該都深深體會到股市恐懼病毒，傳染能力仲勁過沙士。儘管債息顯示希臘最後選擇賴債，或者更多人稱的「有秩序」賴債的機會率，高達九成八，可是一日未正式宣布落實，股市不安情緒是有增無減，港股上星期五個交易日中跌咗四日，全個星期累積跌1,787點或者9.2%，創接近三年來最差紀錄，睇番年初至今，恒指累積跌幅達23.3%，喺全亞洲股市中排包尾第一，贏咗跌21.4%的台股，以及跌21.2%的印度股市，話港股流通量夠，係基金經理的最佳「提款機」，真係當之無愧。

基金大戶沽得狠

上星期港股插到開巷，連跌五日，不過大市沽空成交金額卻係愈來愈大，由周一的41.61億元，去到周五嚟個double都唔止，去到98.33億，佔大市總成交971億的10.1%，減番發行商「搓波搓出來」的牛熊證及窩輪成交大約250億，沽空佔總成交比例仲去到13.6%，基金大戶沽不特止，仲要沽「凸」，到底屬於聰明之舉？抑或同「羊太」一樣愚昧？只能等歷史話畀我哋知，可是八月初至今經驗，每次沽空勁升，都有三幾日挾淡倉情況出現，短期恒指反彈去18,500至18,800點，機會唔細。

瑞銀策略研究報告話，大摩日本以外亞洲指數，八月初至今累跌22%，短短40日時間跌咁多，只曾在九○、九七、○○及○八年出現過，市帳率及市盈率跌到1.5倍及9.4倍，雖然未去到○八年金融海嘯時的1.3倍咁極端，但瑞銀的AVM估值模型，去到負1.5。以過去歷史，AVM低於負1，未來六個月有97%機會，股市會高於現水平，儘管股市未必見咗底，投資者可開始諗吓入市，估值最平之選，包括中資金融股、運輸股及本地地產股。

聯儲局議息聲明重申低息期至少會延續到二○一三年中，歐洲情況更差，歐央行死撐1.5厘的指標利率，睇怕未來向下再減的機會愈來愈大。全世界零息以及極低息的環境，有恒常化迹象，最唔着數嘅肯定係保險公司，他們從客戶收取得來的保險金，主要投放於定息投資及債券，少量投入股市及房地產，故未來幾年的賺錢能力，唔多唔少都受大環境拖累，水瓜打狗唔見一截。

上星期友邦（01299）見死貓彈，但上半年業績遠勝預期，主要多得公司在泰元區的資產價值上漲，最近美元轉強，泰銖插水，下半年業績肯定不及上半年，看來短期有反彈無大升。另一隻重災股宏利金融（00945），上星期五曾經跌至86.65元的今年新低，全年累積跌33.6%。宏利股價由海嘯前360元，跌至最低55.3元，之後反彈見193元，今年又再跌過，紅底股身分再次不保。

經近日一跌，宏利預期市盈率去到單位數（但留意業績似乎有向下修訂可能），遠低於歷史平均的16倍，由於目前沒有太多人想持有保險股，這種折讓情況恐怕會持續一段日子，假如已經持貨，建議不妨等反彈出現，股價重返100元附近機會未可抹殺，但如果是以新資金入市，史提芬情願買其他跌得離譜的中資股好過。