股海實戰：廣深鐵路抗跌力取勝

美股前晚炒定可能有QE3，加上內地A股亦見強勢，但香港投資者唔落疊，尋日恒指萬九點只係曇花一現，尾市跌幅擴大，一度逼近上周低位，收報18,824點，跌190點，成交658億元。睇見中建材（03323）同思捷（00330），跌咗咁多都彈唔起，兼且陸續有IPO急煞車，可見魚缸氣氛真係非常之惡劣！

近日與內地股友電聯哭股喪，聽佢講呢排A股表現唔係幾尋常，大戶似在托住指數出貨，恐怕過埋季結同「十一」，滬綜指點都要穿一穿2,400點，所以呢一刻冇勇氣入場撈貨。咁啱阿莊呢兩日都講緊班大戶睇淡中企嚟緊嘅業績表現，並大幅下調中企估值，咁睇落，話A股仲未跌夠，亦非危言聳聽。

中行咪胡亂溝貨

有讀者飛鴿傳書，問點解手持嘅中行（03988）股價可以咁差，連招股價都失守。查實若然只睇其內地業務，確實對其股價弱勢感到不明所以，問題出在中行沾手嘅歐債。近日法國三家銀行被調低評級，聽聞喺雷曼事件中損失不菲嘅中行，已立即叫停跟歐洲銀行嘅外匯交易。究竟今次歐債危機，中行有冇損失？有幾多？目前都係得個「估」字，股價彈唔起，也許反映大戶取向負面。喺咁嘅情況之下，暫難評估支持位，看官要自己計自己數，唔好亂咁溝貨！

近日市場盛傳中央將公布溫州動車組事故調查報告，惟官方回應「沒有時間表」。講開鐵路，唔講唔覺，原來阿莊喺5元邊斬纜嘅中國南車（01766），尋日股價見過五十二周低位3.43元，真係一額汗！

再睇另一隻鐵路股廣深鐵路（00525），查實高鐵一旦通車，對廣深鐵路會產生分流效應，如今高鐵發展有變，對廣深鐵路唔係壞消息。之不過，覆巢之下難有完卵，自溫州事故發生後，鐵路企業嘅舉債能力同估值都大打折扣，點計股價都難免受到板塊利淡氣氛的影響。

本月初有大行入場減持廣深鐵路，近日大摩亦發表報告，將其目標價由4.26元下調至4元，但仍維持「增持」評級，理由係公司現金流強勁，且收益基礎穩定。

睇番資料，該股○八年盈利按年僅跌9%，股價最低落過2元，現價一○年市盈率十倍，息率4厘，市帳率0.65倍，手持現金及等值近30億元人仔，相信未來有能力維持逾四成嘅派息比率，估值已某程度反映不明朗因素。喺2.5元樓下，估值嘅防守性應有助股價對抗地心吸力！