樓市出更：工廈收租盤大款密掃

人民幣持續強勢，前幾年開始，內地大款就一窩蜂來港掃豪宅，不過實施咗額外印花稅後，唔少大款都轉掃工廈單位收租，每次出手金額大約200至600萬元左右。有代理同劉SIR講，有一班來自廣東嘅老闆，幾個月前已經密密喺火炭搵緊工廈連約盤收租，依家諗住先用約3,000萬元買貨。

內地經濟起飛，人仔亦成為強勢貨幣，大款嚟香港買嘢，都差不多可以打個八折。而香港「磚頭」出名保值，其中，近年受惠工廈活化措施嘅工廈，就更加鹹魚翻生，加上入場費低，收租回報較高，吸引到唔少內地投資者入市買番少少投資下。

廣東客夾份跨區掃貨

美聯工商黎紹賢同劉SIR講，有班嚟自廣東嘅老闆，早前已先後夾份買咗西九龍及荃灣多個工廈單位，近幾個月就開始入火炭搵工廈連約盤，心儀單位面積最好大約1,500至3,000方呎，預計總投資額約3,000萬元。

佢哋啱啱上個禮拜就去咗睇火炭環球工業中心一個中層單位，單位面積約2,800方呎，現時每月租金約1.5萬元，相對業主意向價約430萬元，收租回報差唔多4.2厘，初步合晒要求，估計好快有好消息。

火炭工廈年內炒高52%

雖然近幾個月樓市呆滯，但相對內地限購等措施，本港樓市自由度仍相當高，所以北水南調勢頭未減，黎氏話，有內地老闆早前斥約2,200萬元連約買咗火炭世紀工業大廈中層戶，收租回報差唔多4.5厘，好過好多住宅盤啦。事實上，火炭主要工廈平均呎價已經去到2,200元，一年間升值52%，唔怪得咁多內地大款爭住入火炭尋寶。