短炒倉：中通服 估值夠吸引

在近期的跌市中，電訊股表現可謂相當強勢，本地薑數碼通（00315）創新高，和電香港（00215）亦貼近高位。至於三大內地電訊股，中移（00941）、聯通（00762）同中電信（00728），現價同樣距離五十二周高位不遠，完全係當跌市無到。相反，電訊設備股就冇咁好景，七月份更遭洗倉式下跌。以向三大電訊商提供電訊基建支援服務的中通服（00552）為例，上月股價最低報3.38元，比五十二周高位5.76元跌逾四成，不過踏入九月份後見回升，昨收報3.98元。

事實上，內地3G用戶人數持續增加，聯通尋日公布八月份3G新增上客量就首次突破200萬大關。愈多人用，對頻寬需求亦只會有增無減，故中通服生意亦唔憂做，早前公布中期營業收入按年增長16%，至251.89億元（人民幣．下同），錄得盈利10.53億元，較去年同期增長16.3%。

展望未來，雖然「三網融合」出師未捷，但4G/LTE已進入試點階段，電訊基建業有望再次迎來行業高峰期。中通服現價市盈率只係10倍左右，相比同類股中興（00763）嘅18倍同京信通信（02342）嘅12倍都要低；息率3.7厘，亦比其餘兩股吸引。