Fundman睇市：國美可睇位博反彈

執筆之際，史提芬大有落筆艱難的感覺。到底歐洲央行、歐盟同國基會，會否首肯拯救連國債都無息畀的希臘？聯儲局又會唔會有令人意想不到，QE形式以外的刺激經濟方案？在兩個變數有答案前，講到天花龍鳳都無用，今日唔知聽日事。

1隻股票可以每日跌1%，但唔會一插到底跌到零。股市亦一樣，即使跌市都會偶有反彈，昨日朝早標普下調意大利信貸評級，以為港股早市都凶多吉少，殊不知高開90點後，全日好似坐過山車一樣，兩跌兩起，最後收市進帳96點，報19,014點，港股似乎對壞消息開始產生抵抗力，成交比前日稍多，有638億，滙控（00005）同埋剛剛公布八月上客數據表現唔錯的中移（00941）及聯通（00762）成為大市焦點，為恒指帶來60點進帳。

教主Steve Jobs退下火線，不過無阻華爾街賓架對蘋果公司的熱情。前晚，蘋果股價逆市勁升11.1美元，創下411.63美元歷史新高。唔知強勢會唔會同今個星期先後喺上海南京東路，以及中環IFC開幕的Apple Store有關，種種迹象顯示，歐美經濟唔好，蘋果公司更傾向進軍亞洲市場，今次盡顯其大賺人仔的鴻圖大計。網上消息流傳，iPhone5會在下月五至十五日之間正式發布，趕緊在北美感恩節黃金銷售旺季前，大約十月底前就會正式開售。

中資電訊股齊做好

近日幾隻中資電訊股表現強勢，除了八月份上客數字對辦外，另一原因係開始有大行唱蘋果公司短期內會配合內地網絡商，推出多制式iPhone手機。聯通股價尋日升近4%，收17.4元，逼近今年17.68元的高位，事關3G上客量，八月份首次突破200萬關口，去到205萬，按年及按月升103%及9.3%。瑞銀指1,000蚊人民幣的智能手機大受歡迎，儘管供應短缺，但聯通已落定單追加600萬部應付需求，即使截至八月底3G累積上客只有1,380萬，但瑞銀有信心全年2,500萬的目標可以完成。

狼來了的故事成真，○七年推出的家電下鄉政策，將確認在未來半年，陸續在各省市功成身退，家電股近日受消息影響急跌。市場都擔心政策一旦退出，家電生產行業會由史無前例的興旺，回歸平淡，甚至回到二○○○年前後，汰弱留強的局面。

不過筆者懷疑，政策退出對家電零售商的衝擊，有被誇大之嫌。國美（00493）股價由八月中高位3.84元，短短一個月時間，跌近1元，昨收2.83元，當然，市況不濟應該佔相當大的原因。回顧上半年，國美銷售額大約只有5%受惠家電下鄉政策，截至六月底也只有一成三店舖，位於撤出政策的四川、山東及河南等省份。

家電下鄉政策源於歐美金融海嘯，中國透過刺激內需，拉動經濟的施政，現在外圍情況不比○七、○八年樂觀，歐債危機更有愈演愈烈的迹象，毫無疑問，政策退出的時間麻麻，姑勿論如何，國美股價似乎已過分反映消息。技術走勢上，國美過去兩年股價是一浪高於一浪，目前上升軌底部支持大約在2.65元，以目前估值，似乎可以睇位一試博反彈。