股海實戰：聯通仍有上升空間

標普突然降低意大利主權債務評級、市場盛傳希臘擬公投脫離歐元區，又話有法國銀行大戶提取大量存款，意味投資者開始擔心歐債危機最終會波及整個歐洲銀行體系，總之聽落全屬壞消息，偏偏恒指重上萬九點關，升96點收市。

祖國魚缸唔好得去邊，雖然指數靠穩，但滬、深兩市主板總成交唔夠900億人仔。雖然八月份通脹有見頂迹象，但相信要回落至一個安全水平，始能令中央放心結束為期兩年嘅緊縮政策，而喺呢一刻來臨前，A股會繼續反覆尋底，成交萎縮。事實上，從企業盈利角度出發，第三季出口市場明顯轉差，內地經濟增長亦有放緩迹象，第四季企業盈利增長壓力更趨明顯，不景情況，恐怕會持續至明年。

換入公用股避風頭

鑑於繼續睇淡後市，阿莊幾唔想郁都要動手，尋日坐言起行沽出中航科工（02357）及恒地（00012），合共套現131萬元，隨即以平均價18.58元，換入三萬股中華煤氣（00003），另以平均價62.35元買入一萬股電能（00006），一於走入公用股避避風頭。

除咗公用股外，其實呢期跌市，中資電訊股表現都偏強，尋日聯通（00762）出咗最新經營數據，八月份2G動電話用戶淨增長31.5萬戶，較七月淨增長數目多出25%；3G用戶淨增204.9萬戶，首次淨增突破兩百萬大關，亦較七月淨增數目多9.34%。整體經營數字理想，難怪尋日股價一度抽高至17.5元，直逼五十二周位17.68元，收報17.4元，升3.94%，成交5.97億元。

早前聯通宣布嘅中期業績已勝於市場預期，再睇七、八月數據向好，估計第三季表現可交出好成績，配合下月美國蘋果公司推出iPhone5，相信股價強勢可持續至第四季初。再睇技術走勢，聯通股價10日線月初重上50日線，預示走勢轉強，現價14RSI處於63，向上空間仍然充裕，短線回吐落番16.5至17元料有承接，破頂下一阻力上移至18元，支持位喺15.7元。