Fundman睇市：內房股恐防未跌夠

周末歐洲財長在波蘭舉行會議，並無達成任何具體的救市協議，專登飛去勸說歐央行唔好畀歐債危機擴大的美國財長蓋特納，結果碰到一鼻子灰。希臘今日就要償還7.69億歐元國債債息，全世界都知佢無錢，你話點收科？

從近期幾個歐元區央行行長，都表現出各家自掃門前雪的態度，希臘賴債機會未可完全抹殺。尋日幾個「歐豬」國的國債違約掉期，已經全線抽高，西班牙五年國債去到410點子，意大利去到488點子，葡萄牙更升至1,110點子。到底今次希臘危機係小菜一碟，抑或一石激起千層浪，假如屬於後者，推測落去，最惡劣的景況，係歐洲銀行手上「歐豬」債要大撥備，一旦出現擠提，在資本不足情況下難以籌集足夠資金，演變到國有化收場，到時真係無眼睇。投資者今日唯一可做嘅，就係持盈保泰，盡量減少入市，保留更多現金等市場出現恐慌拋售時執平貨。

失守萬九後市不妙

今浪港股終於第一次失守萬九點關口收市，恒指跌537點，報18,917點，但大市成交只得536億，低成交下，基金想沽貨應付贖回並唔容易，這亦可能是誇張了應有跌幅的最大理由。萬九點似乎是港股一個重要指標，近一點的，是美國金融海嘯後，港股由○八年低位10,676點開始反彈，中途的第一站調整，在一○年五月，最低只係去到18,971點，再次跌穿，意味海嘯後展開的升浪，可能只係一次大跌市後的反彈，並唔係一浪高於一浪的牛市。

再數前一點，係○七年八月，恒指受第一波的次按風暴拖累，港股一個月內由兩萬三點跌近四千點，多得其後證實純屬「吹水」的港股直通車，恒指由最低點19,386點，短短三個月內直奔近32,000點的歷史高位，可見萬九的確是港股重要轉捩點，一旦失守而未來幾日無法重返其上，最壞打算，中期可能要見15,736至16,598點之間任何一點，相當於近二十年來的兩次低位，即九八年八月及○八年十月的最低估值，介乎7.3倍及7.7倍之間。

筆者的撈魚名單中，內房股一直是首先考慮之列，可是今浪內房股算跌得遲，跌幅亦唔算特別大，幾隻筆者心水，世茂（00813）年內累積跌39.2%，雅居樂（03383）跌36.4%、富力（02777）跌35.6%，碧桂園（02007）更只係跌得6.7%，仲少過恒指今年的17.8%跌幅，以為限購令加上收緊銀根，會令內房銀出現較極端的低估值，殊不知，實際內房股的跌幅卻是相當有秩序，這令筆者反而覺得今浪似未跌完。

○八年海嘯，部分內房股可換股債券，息率誇張到高達50厘甚至逼近100厘，市場對內房股的償債能力極度懷疑，幾乎是擔心「過得今日，過唔到聽日」一樣。對比下，今次市場冷靜得多，像富力的可換股債券，近兩個月內由低位5.5厘升至7.065厘，世茂一六年到期債券，由8厘升至12.4厘，雅居樂的一七年到期債券，由8.3厘升至10.8厘，碧桂園一八年債由11厘升上12.1厘，均只是平穩上升，令筆者反而不敢輕舉妄動，似乎內房投資者信心崩瀉的一刻，尚未出現。