股海實戰：統一唔驚被狙擊

正所謂「屋漏兼逢連夜雨」，本已捉襟見肘嘅希臘，新「水」遲遲未到，今日又要應付7.69億美金債息。歐元區各成員國呢回「火燒連環船」，美國亦唔好得去邊，經濟疲弱，就業市場一潭死水。阿莊奉勸各位接受現實，歐債危機嘅利淡消息將會無日無之，繼續跟美國經濟衰退論唱雙簧，唔慣逢反彈做淡者，除咗閉關修道之外，真係冇咩好做！

中航科工走勢轉差

講番短期策略，尋日恒指既已插穿萬九點，可等候再試上周低位18,627點，先開始諗博唔博反彈。組合中，中航科工（02357）近日走勢轉差，50日線跌穿250日線，睇勢呢轉要穿3元關，正考慮落車止蝕，候低再上車。另外，十月施政報告頗大機會提及復建居屋，此前有位都要忍痛沽出恒地（00012），輸少當贏！

受到家電下鄉措施將分階段結束嘅消息打擊，家電股尋日成重災區，海爾（01169）急挫16%；創維（00751）及國美（00493）分別跌14.9%及8.3%。過去兩年被視為投資者樂園嘅家電股同汽車股，國策光環相繼失去，股價回歸基本步，宜待評估政策轉變對收益嘅實質影響，先至再考慮撈貨。

橫睇豎睇，縱使內地物價如何貴，居民都要花喺「食」身上。隨着原材料價格可望有所回落，加上近年內地居民對食品質素要求提升，有利產銷規模龐大嘅品牌食品商持續發展，故同屬內需範疇，食品股會係相對值博嘅股類。

提到呢類股，近幾個月康師傅（00322）同旺旺（00151）都頻見沽空，但相比之下，統一（00220）表現較平淡，畢竟大股東持股量逾73%，大戶要借貨沽空都唔容易。再睇圖表走勢，3.7至3.8元乃○九年下半年以來嘅主要支持位，落到呢個水平跌唔落就有得諗吓，主要阻力位喺4.6元。