荃灣工貿樓逆市照搶

早前涉嫌挪用巨額公款嘅中國銀行廣東開平支行前行長許超凡等人，被法院下令出售名下多項物業抵債，部分物業尋日喺私人拍賣會上推出供競投。

其中荃灣有線電視大樓兩個物業反應最好，比開價搶高11.6%同19.6%，劉Sir估計買家係睇好毗鄰近起緊嘅新樓，將會帶動樓價向上而入市；相反，藍田滙景花園4個住宅單位全部未到價收番。

忠誠拍賣尋日推出呢批法院令物業，劉Sir都去湊熱鬧，現場有近50人捧場，反應唔錯，最受歡迎嘅係有線電視大樓高層8室同9室，8室面積約2,755方呎、9室則2,883方呎，分別開價630萬同661.5萬元。

有線大樓單位搶高19%

其中，面積較大嘅有線電視大樓高層9室競投最激烈，有5個人出價爭，一共承價35口至791萬元沽出，比開價高19.6%，呎價約2,744元；8室亦有16口叫價，最終以703萬元成交，高開價11.6%，呎價約2,552元。

其實，附近起緊嘅新工貿大廈ONE MIDTOWN中層戶每方呎都要3,500元，相信可以帶動有線電視大樓做價，買嚟長線收租或者睇升值都幾和味。

不過，藍田滙景花園4個住宅單位反應則麻麻，劉Sir認為可能係銀行再加按息，同埋單位以市價推出有關。該批住宅單位競投氣氛一般，只係比開價搶高4至5%，最終全部未到價收回。至於尖沙咀新東海商業中心低層903室同904室，一併以2,043萬元開價，亦無人出價收番。

屯門兩伙將原價翻叮

翻查資料，中國銀行為追討許超凡等人侵吞嘅巨額資產，今年初入稟高院針對其名下四間公司的大批物業，要求法院下令出售抵債。

另外，下個禮拜私人拍賣，亦有一個法院令屯門兆禧苑D座中層15室單位，同埋屯門市廣場4座中層G室疑似事故單位同層戶，以110萬及188萬元原價翻叮。