Fundman睇市：電訊股繼續跑贏大市

近期股市坐過山車咁，幾乎每日睇住個市，都要食定暈浪丸，不過過去周末嘅金融市場卻出奇咁平靜，上周五道指貼實高位收市，升75點，報11,509點。金價反彈，重返1,800美元樓上，每安士報1,812美元，反彈34美元。歐洲股市持平向好，英德股市報升，唔經唔覺，德國DAX指數由上星期一低位反彈足足有一成二，對比恒指低位回升4.4%，話香港股市唔係基金提款機都冇人信。估計本周恒指補完19,303至19,808點的裂口之後，反彈會進一步逼近20,550同20,975點兩個重要阻力。

全國人大常委會前副委員長成思危，出席國際財聯第41屆世界大會時話，今後幾年世界經濟的增長緩慢、曲折及起伏，但就認為「第二次探底」，即係我哋成日講嘅「雙底衰退」機會率，仲係少於五成，係咪代表官方想法？唔知，不過較街外稍稍樂觀的睇法，多少道出官方因應今次歐債危機，人行提早將金融政策由緊轉鬆的機會唔大。

加按息姿勢多於實際

春江水暖鴨先知，上星期五，新地（00016）及恒地（00012）尾市畀淡友愈隊愈有，收市之後終於知道死因，佔本地樓按市場份額最大的滙控（00005），宣布今年第五次調升按揭利率，加幅最高半厘，穩坐樓按第二把交椅的中銀香港（02388）亦隨即宣布跟隨，今次主要針對H按利率。雖然話香港銀行拆息目前只係0.05至0.28厘，查實幾間大銀行H按都去到2厘以上（調整後滙控更去到2.3至2.7厘），根本仲貴過P按，加同唔加都係心理大於實際，只係話畀客仔聽，你哋唔好再打H按主義，本銀行唔做你生意。

早輪史提芬有位在本地銀行財資部工作的朋友，話內地水緊，加埋歐洲立立亂，近期明顯影響到本地資金頭寸，有銀行私底下以H加30至40點子高息吸引機構性客戶存錢，情況持續，唔再做無錢賺兼分分鐘輸錢的H按，只係遲早問題，但如果話今次會影響到樓市，由量跌變成價跌，筆者就唔係太相信，始終美元低息恒常化，港元又無「吉士」去脫鈎，在租金回報平均4厘，高過利息2厘接近一倍的情況下，樓市要由高位調整多過○九年，睇嚟唔容易。

八、九月小股災，能夠獨善其身，不外是公用股及電訊等高防守性股份，像中移（00941）由68元水平升番到接近80元，成為大孖沙的資金避難所，董事長王建宙話，已經同蘋果公司傾過，推出TD制式LTE iPhone的可能性，亦已獲得對手「積極答覆」，睇嚟中移股價短期內要向80元樓上進發。

智能手機的普及，的確為多年來客戶平均消費拾級向下的電訊供應商，帶來了一條新財路，筆者的兩隻愛股，數碼通（00315）上星期升到18.02元創科網熱之後新高，和電香港（00215）雖然重返3元樓下，但近兩個月經已跑贏大市一條街，展望兩間公司都趕緊推出4G，速度更快的流動數據LTE，假如像歐美國家，趁推出LTE取消定額任用，數據收入增長，好大機會再高於預期，相信未來三至六個月，兩隻股票都會繼續因為4G概念，表現強於大市。