股海實戰：中銀吸引力勝同業

今年「金九銀十」效應被歐、美危機蓋過，上周港股創下兩年多新低，反彈呈一浪低於一浪，論走勢可謂十分惡劣。短期恒指支持位已下移至18,500點，向上19,800至20,000點會遇上較大阻力，看官宜繼續持盈保泰，別心急入市撈貨！

特區政府宣布第三財季新推土地安排，新供應數量唔細，唔知係咪有春江鴨聞風，上周五率先沽售地產股，見尾市多隻地產股顯著回吐，恒隆（00010）跌3%，會德豐（00020）及希慎（00014）分別跌2%及3%，恒地（00012）亦倒跌0.12%。

中信証券H股上周五開始進行路演，按計劃將於「十一」後掛牌，據聞已找來七名基礎投資者。參考國泰君安（01788）及海通（00665）嘅表現，也許會令投資者對認購中信証券感卻步，但實情係今趟中信証券乃先A後H上市，而以總資產計，乃全國券商之首，而在本地上市的國泰君安及海通，只屬內地券商在港的子公司，故直接比較並不洽當，呢一點有必要弄清。

樓市前景成關鍵

中銀香港（02388）今年初以來股價累跌達三成，現價已回落至金融海嘯前嘅水平，表現之差僅次於○八年，惟以去年度純利計，業績已突破○七年嘅水平，現價往績市盈率十三倍，市帳率1.8倍，息率4.7厘。對於應否低吸中銀嘅問題，從基本面出發，兩地商貿活動進一步融合，加上人民幣加快國際化進程，中銀受益不用多講，但呢個過程並唔係一步到位，而係循序漸進，對中銀短期估值影響正面，但不宜被過分誇大。

中銀估值向來對地產及信貸市場嘅表現敏感度較高，事關該行為香港樓按市場嘅主要參與者，喺預示未來六至十二個月樓價存在兩至三成下跌空間嘅前提下，樓按業務存不明朗因素；再睇股市低迷，經濟增長亦有放慢之虞，貸款及理財等業務亦存風險。另一點須注意，乃該行持有一定嘅歐債資產，亦足叫投資者感到不安。今年以來中銀嘅股價表現，正好反映這一系列風險，係咪經已跌夠，阿莊亦唔敢妄下判語，只係若然要喺銀行股之中作選擇，相對於其他國際化，又或係側重本地市場嘅同業，中銀仍有其優勝之處，足以留住長情股東！