樓市出更：銀行突閂水喉玩殘上車客

本港利息維持低企，唔少業主為求出貨擴大議價空間，為上車客製造入市時機，不過，劉Sir聽聞有銀行好似計劃再進一步關水喉，令買家入市添阻力，有上水區買家準備上車之際，銀行拒絕樓按貸款。

上水及粉嶺區等新界北細價屋苑，向來係上車客嘅入市起點，雖然此類單位銀碼細，但近期亦出現罕有銀行拒按個案。

聽地產代理講，近日個別銀行有進一步關水喉現象，好似上述上水區上車客，原先打算以九成按揭置業，入市前已經計好晒數，同時向多間銀行查詢，最終以約250萬元購入區內一個大型屋苑單位。

慌忙另覓按揭

據聞，上址原已獲銀行估足價，但其後銀行檢查該買家嘅資料後，順理成章咁向佢發出申請按揭通知書，正當買家一心一意準備上車之際，銀行竟拒絕佢嘅按揭申請，而買家需响完成交易前，急急再撲按揭。

地產代理表示，其實當準買家簽下申請按揭通知書後，銀行大多已經審查了申請人嘅資料，並且準備預留金額畀貸款人，所以最終唔批出按揭嘅情況實屬罕見，至於該名買家打算以九成按揭入市，所以按揭保險公司亦都會考慮按揭被拒嘅原因，作為批出按保嘅參考，不排除將會影響其日後的申請。

無力上會終撻訂

有代理朋友同劉Sir講，自從收緊樓按措施推出後，金管局對九成按揭貸款人收入要求明顯提升，該局亦向銀行發出指引，每月供款比例收窄至佔收入約四成。

翻查近日二手樓市資料，市場亦錄到唔少因按揭問題而撻訂個案，好似早前購入將軍澳中心低層單位用家，因按揭問題無力上會，亦要撻訂取消交易，反映按揭問題，係置業人士主要面對嘅最終考驗。