市場徐想:六福高增長有道理
金舖生意真係旺到你唔信,見到繁忙地段,好似旺角等地方,竟然可以有幾間金舖開喺地下,咁惡租都頂得住,咪話唔叻。
六福集團(00590)咁強勢,因為不愁冇人買金。有人話呢類公司危險到反艇,但係睇番呢幾年,內地個人遊令同胞們不斷來港消費,零售業靠呢條水又真係撐起半邊天。點解同胞唔喺內地買金,走嚟香港買?造假情況咁嚴重,連人仔都有得假,你話大拿拿九九金,畀你揀會去邊度買?所以呢幾年六福股價飛天,根本係意料中事。
睇番數據,集團由○七年到現在,生意愈做愈大,純利有增無減。單以一一年業績,就上升了63%,平均每年都有幾成增長。試問租貴人工貴嘅今天,有咩行業可以打出一個咁標青嘅業績?約二十倍市盈率,反映咗呢隻股票嘅高增長前景。雖然股價由以前3蚊升到依家33.35元,但係息率都仲有近2厘,咪話唔勁。你歐債有危機,我就揸住金銀珠寶睇你點行!