股海實戰:比亞迪步入休養期

港股尋日雖然隨外圍反彈,但力度有幾強,大家心中有數。嚟緊恒指服務公司要檢討恒指成分股,最大機會被剔除嘅,相信會係思捷(00330),身為藍籌股,股價單日跌幅可以達到17%,如今市值唔到200億銀,最慘係發展策略仍備受質疑,股價不知何處是底!

阿莊尋日話過,本月眾多因素影響之下,銀根將明顯趨緊,已有內房股放風話會調低開盤售價以圖刺激銷量,加快套現,似乎今次內房宏調即將進入「戲肉」,若年底前傳來有中型以上嘅內房企業倒閉,亦不足為奇,反正呢個就係內房政策近尾聲嘅必然現象!阿莊個倉有幸有不幸,不幸係有內房股──上實城開(00563),有幸嘅係上實城開已泊得上海實業(00363)呢個大碼頭,有絕對財力應付危機。

內銀股回歸基本步

除咗內房股之外,內銀股亦唔好得去邊,中國銀行(03988)市帳率已回落至一倍,就連估值一向較同業享有溢價嘅招商銀行(03968),市帳率亦已回落至兩倍,工行(01398)、建行(00939)、交行(03328)及農行(01288)則介乎1.2倍至1.6倍。阿莊相信,未來數月A股將繼續尋底,但在港嘅內銀股估值已幾近回歸基本步,估計再跌幅度喺一、兩成之內。作為中長線部署,農行回落至2.8至3元水平有得諗,可以認真考慮落第一注。

正所謂「福無重至」,比亞迪(01211)近年主力發展嘅汽車業務銷售表現不濟,加上「新能源」炒風已成過去,股價不斷走下坡,近日傳來裁員消息,復遭內地官方傳媒質疑其產品安全,真係多災多難。面對呢個敗局,據聞公司董事長王傳福最近亦不得不喺股東會上首次承認,○九年比亞迪汽車實施嘅策略失誤,現時裁員及調整係為了「補過」,今年至一三年公司將進入調整期。

迷途知返,係一個好嘅開始,但未來公司能否找對方向,重新上路,尚有待觀察,畢竟作為一家上市公司,首要係為股東謀取合理利潤,嚟緊為汽車業務去蕪存菁,裁員、整體產銷規模縮減,係必然過程,幸好尚有電池及手機業務支撐,如今股價已回落至○九年初嘅起步位,相信未來股價要過平淡嘅一年,股東們須耐心等候「調整」嘅成果!

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!

阿莊

比亞迪主席王傳福承認業務策略失誤,未來將透過裁員等手段作補救。(資料圖片)

比亞迪主席王傳福