旺區舖摸貨冚旗
銀行閂水喉,動輒幾千萬元買賣嘅一線零售區舖位,買家都要停一停,計下數,睇下夠唔夠錢至拍板,所以近期商舖買賣兩閒,有代理數到,上個月銅鑼灣等四大零售區舖位買賣只有17宗,按月少咗超過三成四,仲係○九年六月以來最差嘅月份,慘淡程度同○八年金融海嘯差唔多。
環球股市大起大落,唔少代理都估計,游資理應流入物業市場,點知銀行收緊按揭,搞到唔少諗住買舖保值嘅投資者縮沙,寧願走寶,好過坐艇,最終成交量慘淡收場。
中環舖八月1成交
美聯旺舖董事盧展豪同劉SIR講,今年八月份,銅鑼灣、中環、旺角及尖沙咀四大零售區商舖買賣加埋只有17宗,涉及成交總值3.47億元,按月分別少咗約34.6及58.7%。
其中,近年新貴嘅中環區,全月只有1宗細價買賣,成交金額只有180萬元;而銅鑼灣亦唔好得幾多,只有兩宗買賣,金額加埋只有1.96億元左右。
四大核心區無摸售
九龍方面,尖沙咀算係逆市奇葩,八月份全區共有8宗買賣,不過,就旺丁未旺財,期內金額只有約1.03億元,最大嗰單成交金額亦只係得7,300萬元,可見大額成交明顯收縮。
另外,上月份該四大零售區一宗「摸貨」都無,亦為近月罕見。以目前市況推算,前景未算樂觀,估計今個月市場交投仍然牛皮偏軟,全月可能得20宗左右。
雖然核心區商舖買賣靜咗落嚟,但係銅鑼灣靚位商舖嘅租盤仍然十分搶手,例如利園山道23至25號舖早前就畀一間國際鐘錶品牌睇中,豪擲230萬元每月租用上址,較之前租金多近三倍,相信下個季度嘅商舖焦點會落喺租賃成交市場上面。