Fundman睇市：收租股抗跌力唔輸蝕

近期大市似乎食月餅食到滯咗，上星期四、五，多項對環球股市舉足輕重的消息公布，結果市場卻是異常平淡，歐洲央行維持歐元利率在1.5厘不變，無畀到市場驚喜，聯儲局主席伯南克承認會在本月二十及二十一日，一連兩日的聯儲局議息會議上，研究新招應付當前疲弱經濟，只係將早兩星期Jackson Hole的一段講稿「Copy and paste」。

經濟同就業市場唔掂，美國總統奧巴馬民望不斷向下，終歸會唔會衰到做一任短命總統？暫時好難估計。為明年的選舉鋪路，上星期奧巴馬拋出的振興美國就業計劃，總算有小小意外驚喜，包括增加基建、協助地方政府招聘失業工人，削減薪酬及小型公司利得稅的振興方案，而且規模就比傳聞的3,000億美元更大，達4,470億美元，本來市場反應應該比較正面，可惜是執掌過半數議席的共和黨，已經表明唔會支持，搞搞吓，隨時好似上個月有關調高國債上限嘅爭論咁，變成一場鬧劇。

中國通脹由七月的6.5%回落至八月的6.2%，並無好似路邊社消息咁，跌到6%以下，美銀美林認為，人行短期內唔會畀到市場存款準備金率見頂回落的錯誤訊息，但有機會降低中小型銀行存款準備金率要求，解決中小企水緊的情況。

港股隨時再探底

假期前，港股跌46點報19,866點，大市總成交連500億都唔到，得497億，乃年內第二低，期指尾市愈跌愈多，以19,723點大低水143點收市，相信係基金經理怕周五晚歐美股市有咩冬瓜豆腐，所以沽定期指以對沖手上現貨風險，而整體大市向下再尋底的機會仍是比較大，19,300至19,500點最好守得住，否則第三隻腳一旦出現，再試18,868點的機會唔細。

踏入第三季港股偏軟，住宅樓價就因為業主持貨成本低，故呈現膠着狀態，若論表現一枝獨秀的，要數商舖租金。多得內地豪客一擲千金，銅鑼灣、尖沙咀的一線商舖租升個不停，今年部分大型商場新續租約租金加幅達二至四成，本地收租股理論上有最強的抗跌力，意外是幾隻商舖收租股，近期都錄得頗大的跌幅。

希慎現價見吸引

銅鑼灣大地主希慎（00014），股價五月見過高位39.25元，筆者期間也曾經推介，可惜之後隨大市偏軟，上星期五更低見29.35元，與今年低位29元相去不遠。在預期商舖及寫字樓租金，因區內供應唔多而高企，加上重建的銅鑼灣希慎廣場開始入伙，可供出租樓面增加，故對於希慎的股價表現，筆者也覺得意外，但亦正因為市場的非理性拋售，令現價變得更吸引。

綜合大行預測，希慎今、明兩年不計算重估溢價的核心溢利，分別為12.96億及15.84億元，每股盈利1.228元及1.507元，股息0.781元及0.876元，現價相當於2.66厘及2.985厘股息回報，已高於歷史股息率1.5至2.2厘。近期電訊及公用等高現金流高息股，展現出相當抗跌力，相信主攻商舖及寫字樓的收租股，表現唔會輸蝕。