股海實戰：新人事新作風 中旅有望走出低谷

內地八月份CPI報6.2%，表現符合預期，增速放慢，但仍處高位，故宏調鬆手可能性甚低，但短期不具加息條件。A股表現平淡，滬綜指上周五微跌1.19點，收報2,497點，滬、深兩市主板總成交唔到1,000億元。港股可謂同病相憐，同日成交僅497億元，乃今年第二低單日成交額。

金魚缸水盡鵝飛，即使奧巴馬強勢宣布大規模創造就業措施，以圖刺激疲弱嘅經濟，但大家都知道方案尚須兩院通過，經過上次國債險告違約事件，市場對方案能否獲得通過打個折係好自然，故見投資者並冇頭腦發熱入場追貨。展望本周，今日內地A股中秋假期休市，明日港股休市，相信今日港股表現會持續淡靜。參考圖表走勢，雖然恒指底部支持上移，但若然月內反彈上唔番21,000點，後市仍有機會再試19,000至19,200點支持。

上周四有本地行買中國人壽（02628）出現烏龍交易，聽講中咗嘅股份經已透過配售等方式全數處理，沒有影響客戶，而事件係同系統出問題有關。阿莊認為，動輒總值幾百億元嘅烏龍盤若然可以輕鬆過關，對客戶資產安全以至市場穩定會構成極大潛在影響，究竟今次事件係涉及AMS（交易系統）抑或BSS（經紀自設系統）系統問題，監管部門以至整個證券行業宜多加探討，找出問題作出改善，並以之為鑑。

講到呢個範疇，阿莊亦聽聞，包括交易所、大摩、里昂、滙豐等一眾大型業者，明年將為旗下交易系統進行全面大升級，若然消息屬實，相信對香港金融市場發展係好消息，事關港股唔會長期都係單日得幾百億銀成交，當經濟復甦（也許喺一三年才出現），金融產品多元化以及地區性市場進一步融合，交易量將顯著提升，交易系統必須與時並進，才能應付挑戰。

加速內地業務發展

講番個股，上周五傳來香港中旅（00308）委任王帥廷為主席兼執董，呢位仁兄之前係華潤電力（00836）主席，睇到呢幾年潤電規模不斷擴張，縱使唔少同業都錄得虧損，公司仍能保持盈利，相信呢位企業領導係有能力之士。

有追開呢個欄嘅，都知道阿莊一提起中旅就覺神傷，皆因呢幾年嘅業績同股價表現都差到冇朋友！如今找來一位喺強勢紅籌做過高層嘅猛人坐陣，希望能夠協助公司充分發揮先天優勢，緊跟國策，加快喺內地旅遊行業嘅發展布局，改善低迷嘅股價及資產回報率。好嘅開始係成功嘅一半，且將此紅籌納入觀察名單，一旦新人事新作風成功開創新局面，可以另眼相看！