破頂樓盤買少見少？

近日市場充斥負面情緒，樓市難有起色，一份樓市數據睇到20個成分二手屋苑當中，原本有11個調整呎價超越九七年高位，點知個市一回，又減到得番7個，其中有4個「水位」得番3%唔夠；至於港島區的城市花園同太古城，呎價比九七年高出21%。

近排二手樓多咗人減價，尤其細價樓大部分有價講，令呢類單位交投旺番啲，不過市區中上價樓做價仍然企得好穩，劉Sir啱啱睇咗份中原城市領先指數，份指數包含咗100個成分屋苑，之前市旺嘅時候，升極都有，最多仲試過有11個屋苑超越九七價，不過隨住市況回落，突破九七價嘅屋苑已經減到得番7個。

第一城恐插穿九七價

根據有關數據，樓價指數最新報98.6點，已經由早兩三個月錄得嘅100.72點高位，回落咗大概2.1%，依家呎價仍超越九七年的7個成分屋苑，當中有4個屋苑樓價，包括沙田第一城、荔枝角美孚新邨、鴨脷洲海怡半島，同埋新元朗中心，比起九七年都只係高出0.8至2.7%左右，實在唔多穩陣。好似沙田第一城，依家調整呎價近5,700元，只係比九七年高出0.8%，如果又有壞消息，呢批邊緣「破頂屋苑」有機會穿底倒跌。

城市花園太古城硬淨

不過，北角城市花園同太古城個價既硬淨兼反彈快，兩個屋苑早排靜市時，比九七年高位高10幾%同不足10%，但依家呎價分別9,500同近10,100元，比九七年高位又升21.8%及21.5%，可見市區中上價樓，樓價仍然企穩。