市場徐想：強積金需引入競爭
近期股市陰晴不定，好多粉絲都小心炒股，不過，就算今年無落手落腳炒股票，都唔代表唔輸錢，因為大部分朋友嘅強積金戶口都不堪入目。
根據理柏基金嘅統計，環球大冧市，八月份嘅平均回報竟然係負5%，股票基金就唔使講，蝕咗近9%，平均來計，MPF基金投資都蝕超過3%。雖然輸錢係無人想，但理財係中同長線嘅投資，時間某程度上可以撫平佢哋嘅傷口。
有人歸咎強積金似一盤坐喺度都賺錢嘅生意，皆因基金管理費係無論賺定蝕都要收你每年1至2%，只要佢哋跑贏基準指標就搞掂，亦都有朋友話應該要向「絕對回報」取經，但係如果要做到「絕對回報」，無論係資產類別、基金選擇上，基金嘅投資風格都係要從根本上改善。「積金半自由行」講咗好耐，我覺得「有競爭真係會有進步」，起碼服務上同質素上一定會有所提升。各位粉絲唔好懶懶閒唔理自己嘅MPF，否則「年輕不理財，老來更悲哀」，咁就慘啦！