Fundman睇市：港交所現價博唔過

阿松話有咁耐風流，有咁耐折墮！這句說話套用於次按風暴之後的金融及銀行業最啱，以前銀行乃百業之母，直到發現美國人原來將有毒按揭包裝，並向全世界出口後，銀行要為大規模的排毒付上代價，前日滙控（00005）準備在港炒三千人，作為香港半間中央銀行，消息當然震撼，但零售銀行已經算炒得遲，近半年環球股市一日差過一日，投行生意今非昔比，有賓架老友話，近期幾乎日日都收到「last day」講拜拜的電郵，部分高薪厚職賓架聚居地，如中半山及貝沙灣，租金都開始逆市回落，想進駐呢類尊貴地段的，刻下係時候。

港股高開低收，報19,912點，跌135點，同早市高位20,159點相比，更係回落近247點之多，無他嘅，睇番收市之後，直到今早港股重開，大家都會好唔得閒，先有歐洲央行議息，跟住係半夜美國聯儲局主席伯南克就當前美國經濟進行演說，市場預期可能會拋出新刺激經濟計劃藍本，今朝七點就輪到奧巴馬在白宮發表3,000億美元振興就業市場計劃詳情，十點到中國公布一連串經濟數據，包括八月份通脹數字，到底今日開大定開細？有待班經濟分析師之後點闡釋。假如純睇走勢，標普五百指數七月開始由1,356點跌到最低見1,101點，共跌255點，0.5反彈阻力約喺1,229點，一日指數上唔番去，一日都唔能夠話大市好轉住。

台泥供股夠另類

近期慘遭洗倉的水泥股，終於見死貓彈，台泥（01136）夠晒別開生面，以20供3比例，供1厘年息的非上市可換股優先股，行使價4.9元，比前日收市價3.23元大幅溢價52%。夠膽出非上市證券，仲要行使價大幅溢價，小股東上船容易落船難，打句問句，都唔信會有好多人有興趣落疊。但掉番轉頭睇，持五成六股份嘅大股東台泥國際夠膽包銷，變相低息借錢畀台泥，大股東唔係傻嘅，咁做只得一個理由，肯定相當睇好公司前景，且看母公司出錢出力下，台泥有無機會反彈返去4元樓上。

高估值股好似溫室效應影響下的冰山一樣，一座一座的倒下，尋日輪到雨潤（01068），一跌就一成六。市況不濟，最好仲係避開二十五倍市盈率樓上，短期增長前景麻麻的公司，史提芬第一隻諗起嘅就係港交所（00388）。原因之一，係市況唔就，新股上市步伐肯定有所減慢，八月就只得一間公司成功上市。短線大市經歷驚心動魄的八月份，港股上月成交額比七月份增加三成六，期指成交更按年增加六成一，但經驗告訴我們，基金應付贖回狠心沽貨後，通常都唔會立即重投市場，大市成交往往都會出現一段淡靜期，年初至今，大市平均成交740億元，比大行估計的780億至850億元少，第四季港交所業績繼續被向下修訂的機會唔細。

綜合預測今明兩年純利53.4億元及59.5億元，港交所一一年預期市盈率28.1倍，幾乎和過去十年平均估值28.3倍睇齊，但恒指市盈率得9.3倍，比平均十五倍有近三成八的折讓，即使港交所唔畀空軍「糟質」，筆者都會懷疑一旦大市出現反彈，「跌得少」的港交所，未必會是基金博反彈首選，140元水平，值博率唔太高。