股海實戰：聯想增長潛力值得睇好

美國即將有多個重大消息公布，尋日缸邊友冇咩好做，好在有戲睇，其一係「大戶屠豬記」，雨潤食品（01068）股價被質低16%，成交達到9.01億元；另一套係「烏龍日記」，某行買貨買大咗，聽講要十幾億銀交收，唔知會點收科！

啱啱先講完令人傷神嘅內地大型消費品牌霸王（01338），又嚟多隻民企食品股股價被洗完再洗，真係睇到頭擰擰。香港係美食天堂，飲食行業百花齊放，從業者都深明致勝之道，就係必須要做好「QC」（質量管理），做得好自然客似雲來；做唔好任你網絡多大，盤生意都好難站得住腳。

針對近年內地民營消費品，做大品牌，成功上市，名利雙收了，卻往往因為產品質素嘅負面傳聞而引發軒然大波。歸根究柢，產業政策扶強鋤弱，透過產業化加快改革係有幫助，但最終企業本身還是不能心存僥倖，發展至一定規模，寧可減慢增長步伐，都要率先全力做好產品質量控制，回應消費者嘅訴求，始能屹立不倒！

講到消費品牌，阿莊唔止一次推介過聯想（00992），六月其股價回落至4.1元水平，阿莊話呢啲位唔應該沽，而係跟住大股東入場一齊買，如今睇嚟取態正確，本月初聯想股價最高見過5.45元，尋日收市報5.07元。

搶佔PC市場份額

聯想截至今年六月底止首季度賺1.09億美元，同比增長達98%，喺全球個人電腦市場排名躍升至第三位，市佔率升至新高的12.2%。近年公司積極推動智能手機及平板電腦業務發展，個人電腦業務保持強勢，購併活動不絕於耳。最近惠普擬出售個人電腦業務，市場普遍認為聯想會係潛在買家，事關若成功取得惠普嘅份額，聯想便可穩坐全球個人電腦市場第二把交椅。阿莊相信，聯想管理層深明任何收購對公司有效益才值得去做，最終會否落實收購，還要視乎作價，且看年底前會否有答案。

由於整體經營表現比市場原先預期好，近月多家大行唱好聯想，中銀國際上月將聯想目標價由5.95元調高至6.25元，並重申建議「買入」；近日高盛亦推介聯想，指其夏季促銷表現良好，供應鏈訂貨預期正面，睇好其增長潛力，故重申「確信買入」評級，十二個月目標價調高至5.8元。至於阿莊，對聯想嘅樂觀睇法無變，但就堅持身處大淡市要盡量避免高追，中線策略宜待4.5元樓下進場，5.5元樓上沽出。