中冶掟南里嗌5億

中國中冶（01618）早年收購西環南里4至14號舊樓，成為首個內地央企在港購併舊樓，而項目亦在日前透過強拍統一項目業權，劉SIR原本諗住去市場打探個項目會點起，點知尋日就有老友話個項目已經極速推出標售，意向價要5億元。另老牌發展商裕泰興持有約95%業權嘅九龍美善同道6及8號，下個月亦建議以底價1億元強制拍賣。

第一太平戴維斯鄭漢華同劉SIR講，中冶早兩日先透過強拍統一業權嘅南里4至14號重建項目，說時遲那時快，已經成件拎出嚟招標，意向價約5億元，今個月二十八日截標。摷番資料，原來呢個項目買入價加埋都唔使3億元，睇嚟舊樓收購真係商機處處。

裕泰興擴市區版圖

另外，裕泰興對上一次喺政府手上投得地皮，要數到○二年以8,300萬元投到嘅香港仔石排灣道商住地。之但係，裕泰興近十年都係搞購併為主，而上述美善同道6及8號，將於下月四日承土地審裁處令由黃開基拍賣行進行強拍，唔講唔知，毗鄰10及12號發展商早已齊集業權，而區內炮仗街186及188號項目，都係裕泰興喺今年先統一業權，似乎好有決心擴大市區版圖。

政府舊年降低強拍門檻至八成後，加快財團收購舊樓重建，土審處今年收到31宗強拍申請，多過舊年全年21宗，仲係九九年有關條例實施以來最多。

近年西半山成為財團熱門收購舊樓嘅區域，新近衛城里2號逸苑最近有9個單位易手，每個成交價介乎1,598萬至1,922萬元，共涉近1.6億元。

今次買家唔係該區一向積極收購舊樓嘅太古地產同恒地（00012），根據註冊處資料，購入上址個別單位嘅公司，其董事包括陳韻雲同顧曉楠，陳氏係VCC Land執行董事兼創辦人。