Fundman睇市：A50溢價低值博率高

周三，市傳美國總統奧巴馬將推出刺激就業計劃，涉及規模達3,000億美元，而共和黨就揚言會反對有關方案。A股強力反彈，滬綜指升45點，報2,516點，高盛預期內地通脹開始高位回落，本周公布八月CPI，會由之前的6.5%回落到6%樓下，市場開始憧憬人行緊縮貨幣政策快將步入尾聲，年底前，在歷史高位的存款準備金率有機會下調，內銀股走強，支持中港兩地股市反彈。

恒指昨高開126點後，全日拾級做好，收市重返兩萬關口，升337點，報20,048點，沽空額64.8億元，相當於總成交的9.9%，算係本星期首次低於一成，是否意味做淡的開始放軟手腳？天曉得。

今年港股特別之處，係唔同板塊的股票估值差異可以大到得人驚，舉個例，五倍市盈率的內銀股有人嫌貴，三十倍的食品及內需股卻有人認為抵買，咁嘅情況下，股票推介呢份工，可以話易做又可以話難做。事實半年前唔少人瞌埋眼就話內銀股平，只係原來半年之後，平嘅股票可以更平。

買指數基金唔使煩

股神巴菲特話唔識揀股的，不妨考慮投資指數基金，皆因唔需要考慮各種股票同行業周期，指數編製公司一籃子搞掂唔使煩。就以恒指為例，目前剛好在二萬點水平，PE大約係9.3倍，以歷史平均大約十五倍而言，看官如果以一個超過三至五年的投資取向，港股目前無疑係一個抵買的水平。

世界上個個都希望能夠高沽低買，最好能夠在股市最低迷一刻入市，回顧九十年代之後，港股幾次起跌，恒指上次低位係○八年美國次按風暴雷曼爆煲之時，○八年十月份，恒指市盈率最低去到7.7倍，再數前一點，沙士時股市並非特別便宜，大約是12.3倍，再上一次，已是上世紀亞洲金融風暴，恒指估值在九八年八月，最低見過7.3倍，如果將兩個世紀低點套用在今日的港股，最惡劣的情況下，恒指有機會由目前20,048點，跌到15,736至16,598點之間，即係比目前再跌17.2至21.5%。

數係咁計，但史提芬認為今次港股見到極端低點，機會唔大，亞洲金融風暴之後，唔少中港企業資產負債表，同九十年代相比健康得多，現金水平大都更勝當年。其次，全球利率處於戰後谷底，長遠而言，投資者對投資回報預期會相對較低，有助支持股市估值，所以盈富基金（02800）會係想入市又唔識揀股嘅投資初哥，一條光明嘅出路。

講開指數基金，不能不提安碩A50指數基金（02823），由於大部分境外投資者無辦法直接參與A股買賣，形成這A股富時指數基金，通常會出現溢價，年初最多試過超過一成，正常情況下，也介乎5至10%，周初罕有地溢價收窄到3.8%（昨日是4.7%）。形成這情況，可能係A股氣氛實在太差，滬綜指由四月的3,000點樓上，浪接浪跌到八月最低的2,438點，散戶透過2823跳板投資A股的興趣減低。當然，傳聞的另一原因，係部分有閒置QFII配額的投行，幫客戶進行套戥，令溢價收窄。

A股現時估值大約13.4倍，幾乎跌番到○八年海嘯後低位12.8倍水平，考慮A股波動性向來較恒指大，2823溢價又較之前收窄，如果想博內地短期通脹見頂，銀根開始由緊轉鬆，刻下入市值博率其實幾高。