股海實戰：霸王溝貨要諗過

呢期股市興玩高低槓，節奏難以捉摸。美股前晚尾市跌幅收窄，加上市場盛傳人行不再實施差別性存款準備金率政策，造就港股尋日高開，恒指成功收復兩萬點關。本周五內地將公布八月份CPI，初步估計同比增速介乎5.9至6.2%，但按月會有所回落。上周傳出部分大品牌食用油及知名酒品紛紛調高零售價，若然呢個提價潮成氣候，應有助紓緩食品股嘅經營壓力。

講開內需，唔知係咪就嚟到節慶消費旺季，尋日運動服裝股有異動，匹克（01968）、安踏（02020）、李寧（02331）及361度（01361）升幅介乎4至8%；本地零售股亦隨大市回升，長炒長有嘅英皇鐘錶（00887）升4.9%，莎莎（00178）及東表（00398）分別升1.8及2.2%。點解今年啲奢侈品股可以炒極都唔厭，阿莊亦覺摸不着頭腦，總而言之，各位自己計自己數，跟炒細細注玩吓尚可以，呢啲水平買嚟揸就唔划算！

中芯復甦遙遙無期

最近收到飛鴿傳書，問霸王（01338）去到呢啲位可唔可以溝貨。講到溝貨，阿莊頓時想起中芯（00981），一家有中國政府長期支持嘅半導體公司，○四年掛牌，招股價2.69元，之後股價不斷潛水，跌穿1元關嘅時候，覺得隻股好平，誰知愈溝愈淡，至今盈利復甦仍遙遙無期、兼夾家衰口不停，結果今年股價最低見過0.335元。

睇番霸王，受去年的二噁烷事件影響，儘管管理層力挽狂瀾，但產品銷情仍大受打擊，今年上半年公司收入同比大降52.7%，至4.39億元（人民幣．下同），轉盈為虧蝕2.94億元。期內銷售及分銷成本增19.8%，主要係應付霸王涼茶推廣支出、追風品牌和霸王新產品嘅廣告費用，以及為挽回消費者信心，增加額外促銷推廣活動所致。

推新產品策略可取

阿莊相信，針對中國消費者口味，中草藥洗髮水市場係有得做，奈何重建品牌工作需要一段時間才能見到成效。除護髮產品之外，其實皮膚護理及涼茶產品嘅發展亦唔錯，公司計劃年底透過分銷商喺內地開設約三千個化妝品專櫃，並繼續加強涼茶產品嘅滲透率，而為集中火力，會暫時推遲新產品線上市的計劃，整體策略可取。

前年底霸王股價高位曾見6.6港元，沒有去年嘅風暴，難以想像可以用唔使1元嘅價格上車。再講番正題：好唔好溝貨？經驗告訴阿莊，寧買貴莫買錯，觀望下半年公司盈利復甦嘅進度，再睇位行事，方為上策。