上水靚舖博十厘回報

睇好上水市中心發展嘅科達地產主席湯君明，○九年喺政府拍賣場投得上水石湖墟新豐路地皮，銳意打造成銀座式商場，預計明年入伙，依家有銀行洽租緊地舖，佢心中月租要50萬元，預計全幢租金每月收入超過120萬；劉SIR估計租金回報率可以超過10厘，實在係唔錯嘅投資，佢仲話對上個月勾出招標嘅西貢酒店地有興趣。

劉SIR尋日同湯生吃飯講開，佢睇好上水地區，原因係該區鄰近深圳邊境，每日有唔少人中港兩邊走，加上石湖墟一帶鄰近鐵路站，所以好多零售店舖嘅生意額好驚人。

佢喺區內起緊嘅銀座式商場就快落成，好多附近嘅商舖業主已經大幅加租，有啲仲叫到天價；湯生話本來有個賣鞋嘅舖位，樓面大約1,450方呎，本身每個月畀緊8萬蚊租，但依家叫到35萬，足足係以前嘅三倍幾，都咪話唔癲。

有意投西貢酒店地

佢依家幢商場仲揀緊客，其中3,300方呎嘅地舖有銀行傾緊，叫租50萬元，估計都會簽得成。至於樓上7層嘅銀座式商場，每方呎租金30幾蚊，連埋地舖計，預計全部出租月租收入達120萬至130萬。以物業地價同建築費超過8,000萬計，回報率超過10厘。

湯生仲透露，對上個月勾出招標嘅西貢第4區酒店地有興趣，佢話區內多年都冇酒店地賣過，有興趣研究入標。塊酒店地市場估計可以賣成14億幾。

樓價三年內勢調整

佢又認為，政府未來供應多，除非港元大跌同超強通脹，否則樓價兩至三年後會出現調整，好似將軍澳區咁，料平均呎價徘徊5,000蚊水平。

佢睇短期樓價會平穩，所以發展商一定唔會平賣樓，「依家買樓最多保值，唔好望佢有好大起色。」另外，「摸王」黎汝遠亦話，近期嘅投資策略會係揸一半、沽一半，因為政府嚟緊仲有好多供應，相信遲啲有平貨執，現階段唔會入市。