期指攻略：波動加劇宜迴避

期指炒家真係好怕三點鐘，無巧不成話，近期幾次轉角點都在三點前後出現，尋日期指三點前，由19,200點起步，突然挾高，最恐怖係去到19,792點，短短個零鐘頭，連周一期指留低的裂口都補埋，誇張到極。

韓股十二月期貨有巨額錯盤交易，有投行要被迫在場外找辦法平倉，以及瑞士突然將貨幣與歐元掛鈎，壓制升值趨勢，筆者三點半左右，從投行賓架確認兩宗消息時，九月期指已挾至19,550樓上，由低位回升接近300點，遇到這種突發性波動市況，若非緊貼的專業炒家，看官最好盡量減少入市張數，並有單日500點以上波幅的心理準備，若承受不了這種波動，短期最好避免入市。

恒指昨低位19,290點，剛好去到18,868及19,047點雙底的延伸支持點，兩日合計累積最多4.6%跌幅，與歐美多個指數相若，反彈合理，比較意外嘅仲係可以即日見19,727點，形成單日轉向，低開高收之勢。

周一恒指留下的19,830至20,178點裂口，會是淡友重要防線，恒指一旦收高於19,830點樓上，淡友應先放棄即市逢高做淡的策略。倒過來說，如果今、明兩日回補裂口後無以為繼，證明淡友仍佔上風，再跌穿雙底機會未可抹殺。