Fundman睇市:副食品股唔怕買貴貨

尋日午後港股市況只能用一個「亂」字去形容,恒指收市前個多小時分兩段升勢,從低位挾高近500點。第一波升浪,傳同韓國期指交易錯盤,合約涉及6.5億美元有關,「肥手指」錯沽近四萬張十二月韓股期指,令十二月韓股期貨一度插低4%,遠多於韓指的1%,之後在場外乞求平倉。

第二波升浪在三點九左右,瑞士央行終於忍唔住再出手干預過強匯價,今次出手夠晒快、狠、準,索性將瑞郎匯價同歐元掛鈎,搞到歐元兌瑞郎交叉盤一下子挾高接近1,000點子。

老實講,消息對港股影響有幾大?肥手指事件近年屢見不鮮,史提芬亦唔信。反而從基金操作角度,近期唔少轉向持盈保泰的部署,沽內銀、內保股,換入高防守性的中移(00941)、中電(00002)等,可是這種調動總有極限,尋日內銀股已有跌唔落的味道,但是否意味着一次挾淡倉來臨?從恒指上落波動咁大,但大市成交連700億元都唔到,基金經理有幾大興趣入市,可見一斑。

聽日至有德國法院對拯救「歐豬」國的合法性作出裁決,希臘國債十足十「八月十六」才擺賣的月餅一樣,無人想要,執筆時一年期希臘國債息率升到83.2厘,違約幾可肯定是必然的結局。近幾日歐股大插插,似乎股市都打定輸數,要預備希臘及其他「歐豬」窮兄弟一旦懶債,銀行及經濟體系要幾多銀紙先可以埋到單。

歐股平均市盈率已跌至9.9倍,企業在美國次按海嘯後,不斷提高現金水平,股息預期回報有4.4厘,睇落極之吸引,偏偏市場恐懼戰勝理智,繼續用估值衡量股市抵買與否,反而被罵是不理智。港股亦不遑多讓,恒指平均市盈率跌到9.5倍,與大大小小股災的低位八倍已唔差幾遠,但能夠在遍地屍骸下,冷靜入市買優質股的,試問又有幾人?

筆者偏好內地副食品股,今年康師傅(00322)、旺旺(00151)及統一(00220)股價分別仲升緊1.4至11.3%,跑贏大市一條街,矛盾之處係刻下通街平貨,是否值得用高估值來追捧這類較不受經濟盛衰周期影響的股票。

睇番三隻股票,即使一二年預期市盈率去到25.2、22.8及18.6倍,比國指及紅籌指數的單位數字,高兩三個開,明顯近期基金鍾意向下炒多過向上,市值較大的康師傅及旺旺,近日持續見到高比例的沽空活動,大孖沙都等股價出現跳崖的一日。

毛利表現有望回升

然而,這類知名度高的副食品股,關鍵係毛利率表現。睇番旺旺毛利率,由○九年下半年42.1%,跌到一一年上半年32.98%,可幸的是,過去兩年銷售持續增長,抵銷了大部分影響,隨着內地通脹快將見頂回落,大環境對他們有利。最近旺旺管理層預告下半年毛利率有機會出現3%以上的改善,假如毛利壓力告一段落,經驗告訴我們,未來兩年盈利增長,幅度將遠高於銷售額。

到底係食品股繼續抵抗地心吸力?抑或係淡友能夠得逞?刻下很難下定論,但如果股價短期跟隨大市出現短暫急跌,筆者都好有興趣「高價」撈貨。

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!

史提芬