股海實戰：銀基跑贏大市有道理

尋日下晝港股大幅波動，兩點五十分恒指才19,318點，廿分鐘後抽上19,623點，十分鐘後又回落至19,425點，收市前一分鐘抽上全日高位19,727點，一個鐘多啲來來回回足有800點波幅，真係夠晒刺激！期指尾段抽高至19,792點後回落，收報19,690點，低水20點。

市況波動期間，特區政府正在舉行土地拍賣，但由於三幅地皮銀碼有限，所以阿莊亦心知唔關賣地表現，後來才知道係瑞郎同歐元掛鈎，執筆時歐洲股市初段走高，但刺激作用有幾持久，冇希望自然唔會失望。

市底虛弱不利短炒

其實早喺上月中旬，市場已熱炒瑞士央行（SNB）會將瑞郎與歐元掛鈎，但卻大熱倒灶，結果瑞郎匯率不跌反升。如今意大利及希臘都極大可能不會實現減赤目標，歐債危機一次比一次糟，SNB此舉顯示干預決心，但會否錯失時機，真係天曉得！講到尾，呢期市底虛弱，環球股市變化甚速，並不利短炒活動。坦白講，呢一刻阿莊嘅入市意欲好低，心理上已做定兩手準備，隨時會再減持股票套現。

市況波動，板塊就強弱互見，尋日表現較差嘅有水泥股，較強嘅就有中資電訊股。顯然，仍留喺金魚缸嘅對沖基金，靠游走於各個板塊，炒上落賺取差價。唔想接對沖基金火棒，就要戒高追！

下周一係中秋佳節，之後再過三周就係「十一」黃金周，內地開始步入傳統消費旺季。專門經銷五糧液及其他酒品嘅銀基集團（00886），本月初起將經銷嘅五糧液68度500ml（亞克力普通裝）零售價調升至1,380元人民幣，料漲價效益可率先喺今個旺季反映。

多元化策略見成績

過去銀基較側重於單一產品，但去年以來，集團取得多個內地酒品嘅經銷權，前年底更開始引入海外優質品牌葡萄酒至內地市場，並於海外銷售內地製造嘅多款品牌香煙，凡此種種均有助推動產品和市場多元化發展，策略正確，難怪有唔少機構投資者捧場。

銀基現價8.14元，往績市盈率十六倍，息率接近6厘，難怪現價與五十二周高位8.8元距離不遠，表現明顯強於大市。7元關乃近年嘅重要支持位，上月大市波動，此位亦曾失守，但迅即收復，向上主要阻力睇52周高位8.8元。

時值大淡市，現金為王，有錢喺手，要趁跌市買入好股長揸，都唔使心急入市。更何況短期環球市況仍大幅波動，傳統股災月「十月」又逼近，較穩陣嘅做法，當然係等股價回落至重要支持位，先至考慮伸出友誼之手！