樓市出更：十客搶嘉湖筍盤

正所謂「瘦田冇人耕，耕開有人爭」，近排樓市稍見起色，新界細價屋苑減價即出現買家搶購，天水圍嘉湖山莊最近有一個高層戶，幾日內減價37萬元放盤後，即日引來逾10組客爭睇，最終有收租客追價至209萬元先成功擊退其他對手。

祥益地產吳偉忠同劉Sir講，上述賣出嘅嘉湖山莊筍盤係麗湖居4座高層D室，面積約709方呎，業主八月底開始放盤，起初叫價240萬元，不過當時樓市氣氛仍然唔係幾好，所以叫價每天遞減，約三日已減37萬元，叫價跌至203萬元，低市價7至8%。

買家不惜請假睇樓

吳氏話，有客人知道有筍盤後，索性請假睇樓，而業主仍未趕及開門，有個別心急買家，已先到同座較低層同座向交吉鎖匙盤參觀，部分更即時出價洽購，到業主開門之後，估計當日逾10組客睇樓。

據聞，單位終獲至少兩組客追價，透過電話向業主出價，其中一名長線投資者，追價6萬元，最終以209萬元、並即時簽署臨約購入上址，呎價約2,948元，仍低市價約5%，若以市值月租計，租金回報率達4厘。

第一城排隊爭睇

細價樓減價後，掀起搶購熱潮，同屋苑另一個樂湖居4座中高層戶，數日內亦累錄近40組客參觀，最終以218萬元成交。沙田第一城亦出現排隊睇樓情形，美聯鍾燕河稱，自去年SSD實施後，屋苑盤源銳減，至今交吉盤不足30個，所以早前一個39座面積395方呎單位出現幾組客喺門外排隊輪候參觀情況，最終單位以225萬元賣出。