Fundman睇市：思捷不宜賤價求售

聯儲局主席伯南克暗示，有需要時會再推出刺激經濟措施，亦將下一次議息會期，由一天延長至兩天，對此上星期環球股市一度反應雀躍，唔少人以為經濟數據好，股市好，經濟數據差，QE3就可以快點出來，同樣會惠及股市。不過，有云「幻想美麗，現實殘酷」，世界邊有咁着數？上星期五，美國公布八月份非農業就業職位無增加，不但比市場預期的增加7.5萬差，仲係一年來最衰，七月數據也由增加11.7萬向下修訂至8.5萬。

數據一出，華爾街三大指數應聲急挫2.2至2.6%，金價掉頭逼近1,900美元，十年美債息由2.13厘急跌至1.99厘樓下，買一個無AAA評級的國家債券，未來十年每年收2厘息都仲有人前仆後繼，大抵上可以睇到債券投資者對前景有幾咁悲觀。

港股後市未能樂觀

上周五，恒指跌372點，收報20,212點，今浪恒指由22,808點起步，跌至最低18,868點，共3,940點，反彈最高見20,975點，大約是整個跌浪的五成三，如今又再跌過，技術走勢都幾弱。八月初至今，藍籌裏面唔使跌的股份，有利豐（00494）、聯通（00762）、中移（00941）及中電（00002），上半年利豐畀瑞銀不斷唱淡，相信只係死貓彈，其餘三隻都係現金流比較強，或者派息比較高的高防守性股份，由基金取態，似乎上次恒指18,868點的低位，未必好穩陣。

周末中海油（00883）證實，會堅決執行海洋局決定，旗下蓬萊油田將停止回注、鑽井、油氣生產，以保護海洋生態，因應事件，花旗調低中海油一二年盈利預測17%。消息對今日股價，肯定有重大打擊。

思捷（00330）上星期發盈警，預告一一年六月底止年度，因為重組開支，業績會出現重大跌幅。睇番中期成績表及第三季營運數據，即使唔算理想，但大行都無預過會衰到要為過時庫存作一次過的撥備，盈警對思捷股價殺傷力唔細，周五跌2.21元，收報19.64元。

上星期，歐盟公布八月製造業採購經理指數（PMI）跌穿50，得49，區內零售吹淡風，歐元走勢又麻麻哋，短期思捷確係無太多selling point。睇番大行原本估全年業績介乎26.46億至36.63億元，較去年的42.26億元，倒退13.3至37.3%，盈警中並無提倒退幅度，美銀美林給客戶的預測，估可能跌40至50%，如屬後者，一一年市盈率會大約回升到十二倍。

市帳率處歷史低位

睇番同級對手，H&M經營得比思捷好，大行估今年業績都要跌一成，市盈率十九倍，到底貴少少買經營好一點的，抑或貪思捷夠平，見仁見智，由於業績受一次過的損失影響，如果用市帳率衡量，思捷目前是1.57倍，此水平自公司九三年上市以來，只曾在九七金融風暴期間見過，如果信思捷品牌仲有做番好的一日，似乎唔應該响現水平殘價求售。至於未有貨的，最好仲係等歐洲業務整合完成，業績開始見起色至諗。