股海實戰：和電有力展開新升浪

美國上月就業數據遜於預期，美股上周五低收，加上傳來希臘對繼續執行緊縮政策有意見，暫停與IMF及歐洲央行監察員談判，故料周初亞洲股市頗大機會低開。

上周五內銀股全線大飲茶，皆因有報道指內地四大行八月份新增貸款遠低於預期，反映喺宏調力度有緊冇鬆嘅情況下，市場「缺水」日趨嚴峻。再係咁落去，年尾無數中小企業仲係咪年關難過年年過，真係要聽天由命！

IPO活動見旺場

雖然市場缺水，但近日傳來中證監放行A股IPO，其中長城汽車（02333）已獲准於本月發行3.04億股A股，初步估計集資額約31.7億元人民幣。此外，九月份港股亦有多家公司擬展開IPO活動，傳聞包括三一重工、中信証券、天福茗茶及徐工機械等。睇嚟投行們睇準月底聯儲局會議召開前，市場對美國QE3來臨滿心期待，為股市帶來短暫平靜期，故把握機會盡可能推得1隻得1隻，免得呢個季度又食白果！

個股方面，上半年備受生產成本上漲，但須苦守凍價令嘅食品製造業，近月情況似有轉機。事緣喺通脹近頂嘅前提下，最近部分內地食用油生產商趁中秋及「十一」假期旺季前提價，部分大品牌零售價加幅逾15%。難怪見到從事銷售散裝食品油業務嘅中國食品（00506），股價由上月下旬低位5.73元，反覆回升至上周五以全日高位6.77元收市。若提價消息屬實，短線該股有勢叩7元大關，50日線支持喺6.45元。

此外，上周五2隻本地電訊股數碼通（00315）及和電香港（00215）股價均逆市做好，升幅分別達到6%及2.3%，主要受惠業績理想。聚焦較合炒家胃口嘅和電，受惠智能手機銷售及數據通訊強勁增長，今年上半年綜合營業額同比升41%至60.18億元，純利升37%至4.94億元，每股盈利10.25仙，中期息每股升至5.16仙，料有助吸引更多好「息」之徒。

翻查資料，上月初高盛就和電嘅一一年度盈利預測為7.18億元，睇完今次中期業績，再計及蘋果公司預期將於第四季推出iPhone5等因素，估值應具上調空間。近日股價突破3元關，可視為新升浪嘅起步台階，短線回吐守穩2.8元可考慮。