藍籌屋苑加租貼晒市 4厘回報無誇張

近月股票市場風高浪急，但係物業市場未見波動，原因係唔少投資者同用家仍然繼續入市。樓價雖然升咗好多，但由於租金都跟住升，二手樓租金回報亦非常吸引，買樓收租仍然係首選；截至七月份主要二手屋苑數字，沙田第一城、荔枝角美孚新邨同將軍澳新都城租金回報都超過4厘。

政府最新消費物價指數按年急升7.9%，其中私樓租金升幅顯著，根據美聯提供嘅最新數據，過去一年，10大二手屋苑樓價顯升，但租金亦向上，租金升幅由4.4%到近一成九，令到租金回報跌幅最大都只係0.8%，個別屋苑回報更同去年一樣，其中沙田第一城就維持4.4厘嘅租金回報。

代理老友同劉Sir講，近期樓價表現牛皮，但租金依然係咁升，依家沙田第一城平均呎租已經去到22元，近期仲有好多單好價嘅租務成交。

另外，亦有1宗租客追價入市個案，21座中層一個面積395方呎單位，業主原先以每月租金8,500元放租，但內地準租客為免單位被其他人租咗，不惜追價至月租9,300元，比原先租金搶高咗9.4%。

租金收人仔仲和味

人民幣持續升值，愈早落實租金，愈慳更多。另外，出租單位嘅業主收到嘅人仔租金，亦會因應匯價向上而有賺，對業主同租客嚟講，都係雙贏嘅局面。

市區嘅將軍澳新都城同荔枝角美孚新邨，租金回報同樣成4.1厘，僅次於沙田第一城。其中新都城喺10大屋苑中，過去一年租金升幅最理想，七月份平均呎租19.6元，按年升18.8%。