短炒倉：鞋股比併 揀達芙妮

港股尋日繼續反彈，恒指成功收復20,000點關，市場氣氛亦有所改善，但睇番外圍環境，歐美問題未解決，內地就繼續收緊銀根，形勢上不利港股進一步反彈，對後市仍未宜太樂觀。就近日觀察，較不受外圍經濟左右的內需消費股，走勢相對硬淨，值得看高一線。

於內地從事女裝鞋銷售業務嘅達芙妮（00210），上月公布了一份相當理想的中期業績，截至六月底止半年純利急升132%，至4.4億元，即使撇除去年同期一筆達1.36億元的認股權證公平值虧損，增長仍達35%。受消息刺激，股價一度急升至接近9元，之後出現回吐，本月初低見7元，但隨即再次反彈，昨日收報8.35元。

業績表現跑贏百麗

講到內地鞋類股，龍頭自然係百麗（01880），剛剛在上星期亦公布了中期業績，正好同達芙妮比一比。百麗半年盈利20.07億元人民幣，增長29%，純睇增長幅度，明顯跑輸達芙妮。而以毛利率計，百麗期內為57%，而達芙妮則為61.2%，同樣係以達芙妮勝一籌。當然，以昨日收市價計，百麗市值1,339億元，而達芙妮就得136億元，只係百麗嘅十分之一，兩者「晒士」上的差距，或可解釋增長表現有別的原因。不過純論估值，達芙妮往績市盈率只係22.9倍，而百麗就高達32.9倍，貴咗一大截，二選一，點計都無理由唔揀達芙妮。

達芙妮（00210）

阻力位：9.0元

支持位：7.8元