Fundman睇市：富士康急需止血良方

美國七月零售銷售數據勝預期，隔晚道指大升254點，收報11,539點。美銀美林出人意表，靜雞雞減持131億建行（00939），貨源由「無開名基金」接晒，一班累積大批沽空倉底等食大茶飯的對沖基金，搞到要倒瀉籮蟹四圍乞貨，建行昨最高挾至5.83元，直到午後開始有足夠貨源流出，升勢才見回順。

恒指升339點，報20,204點，重返兩萬樓上，退一步看，美股勁升，內銀股大挾倉都未能升穿上次高位20,504點，加埋減去建行上板成交唔算多，港股似跌市反彈，多過見底開始新升浪。

建行派對完咗，是否意味內銀跌浪到尾聲？睇落唔多似，四大內銀股，今年中行（03988）跌24.4%、建行跌20.4%、工行（01398）跌12.2%，農行（01288）跌最少，得4.6%，水向低流，尋日工行3,894萬元沽空，比周一的754萬多出4.1倍，農行更誇張，持續見大額沽空一段日子，過去三日沽空分別達1.02億、4,665萬及8,440萬元，佔成交54.5%、26.5%及24.8%，即使基金唔係次次贏，不過估值在歷史低位，沽空依然不絕，可見內銀股在大孖沙眼裏仲係淡過水。

恒安現價唔算平

基金愛股恒安（01044），中午交出成績表，銷售額升27.4%至81.89億元，純利不升反跌1.7%，至11.82億元，主要係受原材料紙漿價格持續高企拖累，毛利收窄6.9個百分點至38.6%，三個數字都係大行預測下限，股價由早市64元一度插至60.55元，收市居然倒升1.1元，報63.9元，以27.4倍預期市盈率計，若非堅信紙漿價見頂，現價唔平，賭落贏面大過賭上。

另一優質工業股葉氏化工（00408），中期純利亦要倒退11%，至1.03億元。原材料成本上漲，加上內地壓抑通脹及樓市吹淡風，影響油漆貢獻減少三成一，主打的溶劑業務毛利亦因為年初高油價遇到壓力，儘管維持12仙中期息不變，但業績同市場預測的全年賺3.81億有頗大距離，短期股價相信仲有得跌。

營運效益待加強

富士康（02038）半年蝕掉1,764萬美元，股價反而抽升0.28元，至3.75元收市，皆因前年公司蝕得更多，達1.44億美元，相比之下，今年上半年虧損已減少八成八，而分析員之前的預測，則是介乎獲利7,300萬美元至虧損2,600萬美元。

管理層表示，堅信可透過成本控制、資源整合及智能手機業務拓展等方面，以提高競爭力，不過史提芬看來未足以扭轉營運的劣勢。以其現價市值仍高達270億，相當於資產淨值的0.95倍（海嘯時最低0.5倍），但就已連續十八個月（三份半年業績）見紅，富士康似乎要盡快恢復賺錢能力，才能支撐目前的股價。