股海實戰：中糧控股期待大豐收

美股前晚再度高收，港股順勢繼續挾高，恒指一度抽高上20,341點，午後有獲利回吐，收報20,204點，升339點，大市成交892億元，扣除美銀配售建行（00939）股份中部分約值217億元配股率先上板，實際成交約675億元。

講番美銀終於落實出售建行約131億股H股，聽聞近月積極沽空建行嘅大戶諗住坐定定攞貨補倉，點知事與願違，結果搞到要喺市場掃貨，見到建行股價尋日踼過上5.83元，收報5.65元，升1.8%，成交251億元。睇圖6元阻力非輕，炒建行CALL輪要見好識收。

油籽加工業務復甦

阿莊揸住嘅上實城開（00563）今年上半年業績虧轉盈，賺5,670萬元，當中包括匯兌差額1.18億元。今年下半年，合約預售收入主要來源自西安滻灞半島項目，其次為成都公園大道項目、天津老城廂項目及重慶城上城項目。雖然下半年內房行業將進入淘汰賽，不排除有業者會被「叮」走，但如今上實城開已被身為上海市窗口公司嘅上實集團入主，相信有足夠實力安度行業逆境，何況現價較每股資產淨值折讓達45%，估值低迷，縱使阿莊持股帳面大貶值，但尚無求去之意。

繼續睇業績股，實力紅籌中糧控股（00606），今年上半年收入同比增48%至336億元，其中油籽加工業務佔64.9%；期內純利同比增21%至16億元，每股盈利39.7仙，中期息每股7.9仙。業績表現理想，故尋日股價做好，高位見7.16元，收報6.8元，升5.92%，成交9,409萬元。

期內全球大豆價格高企不下，棕櫚油進口價亦喺高位運行，成本高企，但喺中央力控通脹之下，產品價格上行乏力，導致油籽加工行業經營壓力甚大。對比行業總體情況，中糧嘅經營表現唔錯，主要通過採購遠期所需嘅原料，並進行套期保值，有效控制生產成本。還記得去年中糧盈利倒退13%至17億元，主要亦係由於為原材料期貨套期保值產生19.4億元帳面虧損所致，當時管理層強調，油籽現貨嘅利潤會喺今年上半年體現，事實說明看法無誤。

究竟下半年中央的阻價政策是否會鬆綁，令產品得以提價，乃中糧盈利及股價表現嘅關鍵。再睇其股價走勢，由月初高位8.96元回落至低位6.26元，累跌達三成，中期業績公布後股價反彈合情合理。純睇圖表走勢，短線7元關仍有阻力，成功突破，下一阻力位上移至7.6元，6.3元水平支持不宜再失。