「大款」換樓蝕入肉

近期市場出現一宗內地業主失手個案，有代理老友同劉Sir講，馬鞍山嵐岸最近有個內地業主，因為換樓遇上資金調配問題，不惜減價將揸咗五年嘅相連單位蝕讓，單係樓價已經唔見228萬元，屬近年內地客罕見蝕到入肉個案。

世紀21奇豐鄭達昌話，嵐岸內地業主佔整個屋苑約三成，至於今次減價賣出嘅1座高層自製相連戶，面積共2,392方呎，屬五房間隔，北望吐露港全海景，以1,500萬元成交，呎價只係6,271元，低市價超過一成。

據了解呢位內地業主早於○六年以約1,728萬元一手買入兩單位並打通，至今一直未住過，由於該業主早前喺九龍市區再度入貨，隨着新買入嘅單位成交期將至，所以該名內地客喺五月期間以1,600萬放售上述大宅套現，可惜近期樓市承接力麻麻，個單位最終要比放盤價低100萬元先可賣出，帳面蝕228萬元，成屋苑首宗相連戶蝕讓個案。

近排有報告講，上半年二手豪宅市場中，已知內地個人賣家比例，由○七年上半年佔3.8%，升到今年嘅6.9%新高，反映到有部分內地業主見投資香港樓價近呢幾年係咁升，都開始賣樓套現又或者換貨。

收租客買澤豐 回報5.7厘

雖然有內地客損手離場，但內地買家入市態度仍然積極，唔少更會買細單位收租，中原鄺家進講，最近屯門澤豐花園2座高層L室以159萬元賣出，呎價唔使2,500蚊，買家係一名內地客，諗住上址月租可達7,500元，租金回報有5.7厘，所以決定買入收租。