股海實戰：首鋼資源佔優勢

市傳人行向內銀下發通知，計劃將商業銀行嘅保證金存款納入存款準備金嘅繳存範圍，市場估計此舉變相再凍結資金八千億元人仔，難怪尋日上海銀行同業拆息幾乎全線抽高，兩周拆息抽高117點子，A股亦受壓。

港股尋日雖然高收，但成交不足，未能配合。內銀股受政策消息震盪，除咗超殘嘅中行（03988）、以及有補倉盤支持嘅建行（00939）同工行（01398）高收之外，其他全線大飲茶。外邊大風大雨，中國發現三年前做「全球救星」嘅代價太高，豈容再重蹈覆轍？如今做好防範措施，確保銀行體系穩定，亦無可厚非！

尋日本欄提及嘅瑞聲科技（02018）彈7.76%，另奢侈品股普遍反彈，六福（00590）、英皇鐘錶（00887）及東表（00398）升7.3%至10.4%，但睇成交，反彈力水一蟹不如一蟹。反觀煤炭股普遍做好，中國神華（01088）、兗州煤業（01171）、中煤能源（01898）升幅介乎2.6%至4.9%，主要係官方傳媒報道，「十二五」期間，內地煤炭工業將加快結構調整，其中包括建設十四個大型煤炭生產基地，推進企業兼併重組，形成十個億噸級、十個五千萬噸級嘅特大型煤炭企業，煤炭產量佔全國60%以上，總括嚟講煤企只會強者愈強。

4元關支持變阻力

前稱福山能源嘅首鋼資源（00639）已收歸首鋼集團旗下，首長國際（00697）為其單一大股東，泊到大碼頭，喺行業淘汰賽之下，自然有一定優勢。再睇首鋼資源最近宣布嘅中期業績，純利11.31億元，同比增長35%，公司預期下半年內地將興建大量保障房及啟動大型基礎建設，刺激鋼鐵需求，作為鋼生產重要原料嘅焦煤價格可維持高企，呢一點大行野村亦表認同，並維持買入建議，目標價5.27元不變。

阿莊取態較為保守，特別係睇到呢隻股今個月跌穿咗舊年低位，落到3元先止跌，走勢明顯轉弱，如今4元關已由支持位變成阻力位，即使3元確實係超筍價（現價預測市盈率唔到八倍），但受制於大淡市，策略只宜喺3至4元水平炒上落。