樓市出更：銅鑼灣舖王再戰新高

內地人蜂擁南下血拚，帶動本港零售業顯著興旺，其中港島核心購物區的銅鑼灣最受惠，不少連鎖商戶及國際品牌，都不惜以高租搶佔該區舖位，一線地舖呎租閒閒地都要幾千蚊；就好似記利佐治街行人專用區嘅大單邊舖，近排業主再拎出嚟放租，租金叫幾多就無講。不過，好幾年前就已經做到呎租超過8,000元，震撼整個銅鑼灣，相信以依家市況，個舖會再創出舖界神話。

事實上，銅鑼灣舖位租金已躍升至全球排名第二位，靚舖可謂「皇帝女唔憂嫁」。

對正百貨店 人流聚集

好似喺銅鑼灣香港大廈地下屬於記利佐治街同怡和街交界位地舖，既有行人專用區之利，加上附近有個港鐵出口，同埋對正內地人血拚目標之一的百貨公司，人流絕對有保證。

個舖面積麻雀雖小，但勝在正正喺人流聚腳點，加上個舖上面有當眼大型電子屏幕，單係廣告效益已賺晒，相信新租金會非常可觀。

業主依家搵代理行幫手招租，雖然唔知業主嗌幾多錢，但有代理講，五年前有個叫做CommonSpace嘅創業工業集團，以每呎超過8,000蚊承租，比當年同區景隆街2號「雞蛋仔」前舖王呎租，高出超過一半，若果以個舖實用面積只有約50方呎計，每月租金大約40萬元。

近幾年銅鑼灣一線靚位愈來愈少，舊年美國一間大型服裝零售店一擲近1,100萬元承租京華中心共6層樓面，區內空置變得更少，加上附近希慎廣場出年就開幕，區內人流勢必定更加暢旺，相信上址新租金將再創舖界神話。

近年唔少國際鐘錶店、化妝品店，同埋時裝店都喺銅鑼灣爭住落戶，據代理行統計數字，依家呎租排行榜首6位，全部都喺銅鑼灣，業主點會輕易平租。