太古城翠湖臺愈老愈好賣

淡市期間，向來是搵優質靚盤嘅最好時機，事關優質盤在旺市時業主多數「吊高嚟賣」，好多時有錢都無貨，加上可趁淡市「鋤」多業主兩口價，實行「亂世」執筍盤；不過向為樓市「探熱針」的港島大藍籌屋苑太古城，近兩個月一反常態，竟連走至少6個樓齡逾三十四年翠湖臺低層質素較次的單位。

劉Sir聽代理老友講，原來自從背靠翠湖臺停車場的太樂樓傳出被收購消息後，向來罕有成交的翠湖臺突然有價有市，上月到至今連走至少6伙，並全屬樓價約400萬至500萬元、呎價約莫7,000元，向橋景、馬路景極低層細單位，難免惹人聯想到，唔通有人想收埋太古城連太樂樓一齊重建？

收購概念未來可炒

事實上，太古城近日受整體樓市淡靜氣氛影響，成交呎價應聲回落，早前平均呎價已突破1萬元關口，依家能夠以約6,000至7,000元入件「平貨」，更可炒未來「收購」概念，數年後附近重建帶來變天發展，亦會刺激目前「低水」翠湖臺樓價狂追落後，對眼光長遠的投資者而言，計落實有着數。

太樂樓升值潛力佳

太古城係大市升勢火車頭，「筍盤」買少見少，上述翠湖臺平價放盤，市場上只有20多個，但同期數平均成交呎價，達8,500至9,000元，尤其個別享海景單位，難怪逆市亦有人蜂擁入市。

講番單太樂樓事件，呢項舊樓樓齡已經超過五十年，最近突然出現約17宗成交登記，每宗成交價去到約462萬至472萬元，有個別單位十年間更升值超過五倍，個價錢咁理想，唔使講都係畀發展商收購。

市場估計應該係區內有唔少發展項目嘅太古地產或相關公司，預計整個項目收購最少超過7億元。