市場徐想：金手指基金動力不減
上周副總理訪港送厚禮，可惜外圍市況不佳，令到「大禮變小禮」，真係無癮。如果有追開本欄，AMS3.8、外匯管制、送大禮，時間性上一致脗合，只等一個新觸發點。哈！又繼續等，冇計！
近排，股壇金手指─惠理（00806）出業績，最強嘅收入來自於表現費，令到成個基金界都流晒口水。大家都知，表現費成為咗基金經理一個好重要嘅收入指標。講到佢哋嘅王牌基金，揸貨五年有一倍回報，真係非常之唔錯，亦算有交代。
惠理依家畀人睇低，係因為佢哋近期都開始「傷亡慘重」，睇好係佢識得搞ETF呢瓣，亦都食住呢期李克強光環效應，陣式上可以睇高一線。雖然近期佢嘅基金贖回潮有增長現象，不過我覺得「揸貨五年，一倍回報」，鎖定利潤先走一轉亦都係合情合理，問題在於佢有冇新嘅大計、新嘅投資理念同策略。買一間公司，係買佢嘅動態力（Momentum），不如大家睇吓，惠理又可唔可以乘風破浪，再創高峰。