Fundman睇市：華創難獲芬佬垂青

雖然隔晚美股勁升過百點收市，但史提芬半點興奮都無，皆因聽到蘋果公司教主Steve Jobs請辭消息，以佢老哥每每奮戰到最後一刻都唔肯放棄的個性，呢次決定退下來，佢嘅健康情況着實令人憂慮，惟有寄望教主今次可以大步檻過。

港股走勢梅花間竹，周二升，周三跌，尋日又借外圍股市反彈285點，收19,752點，整個股市都等香港時間周五傍晚聯儲局主席伯南克在Jackson Hole的演說，睇吓會唔會有QE3上映嘅預告。話雖如此，近兩三個交易日，押注伯蛇會再用直升機撒銀紙的賭徒，似乎有鳴金收兵之勢，十年美債孳息由N年低位1.978厘反彈到前晚2.26厘收市。過去兩日歐美股市風和日麗，完全唔怕對QE3希望愈大，失望愈大，到底係暴風雨前夕特別寧靜？抑或今次股市炒家叻過債券及商品炒家？唔使幾耐大家會有答案，但港股近期氣氛差成咁，今日都係無謂揸太多貨過夜，免得成個周末囉囉攣，心掛掛。

中移防守力出眾

中資電訊股，可能係近排唯一無見光死，兼可以令大孖沙食指動的強勢股份，中移（00941）五日內升4.7%，中電信（00728）三日升14.1%，聯通（00762）更單日勁升12.2%，綜合3間公司上半年業績，分別高過大行估計1%、1.5%及16%，假如走雞無買過，今日再揀，至啱筆者心水嘅依然係中移，每年2,500億元人民幣現金流，3,200億元人民幣手頭現金，近3.9厘的股息回報，在零息年代，股市又風高浪急，這現金牛毫無疑問最具防守性，如果回到75至80元範圍的中下水平，值得諗諗。

瑞銀調低中國今、明兩年經濟增長預測，由9.3及9%，下調至9及8.3%，通脹也由5.3及4%，調低至5.2及3.5%。最不安嘅係瑞銀將中國今年出口增長預測，由18%降至15.1%，明年更由12%大幅降至5.5%，估計出口增長由盛轉衰的轉捩點，將在本年第四季出現。瑞銀預測出口放緩，連鎖反應下，緊接其後是製造業投資及工業生產明顯收縮，屆時人行的緊縮貨幣政策可能告一段落。

昨日中午，華創（00291）份半年成績表出來，大幅倒退63%，賺15.69億元，市場驚弓之鳥有理無理沽咗至算，股價一度跌到去28.6元，比前日收市價30.9元跌7.4%，之後大家冷靜番聽管理層解畫，指帳面倒退，係因為之前有一筆過資產重估及出售，撇除此數，實質盈利仲有18.2%增長，股價跌幅收窄到1.1%，收30.55元。

華創成績本來同大行預測相若，幾個主要項目溢利，零售升18.5%，啤酒升27.5%，飲品升9.4%，唯一較失望係食品加工處理，因為薪資及原材料成本壓力，倒退12.6%。不過，以一一年27.2倍預期市盈率，比紅籌指數一一年估值十二倍高一大截，儘管華創資產負債表好到出奇，處淨現金狀況，但通街平貨底下，大孖沙即使博反彈，華創一類貴價貨亦肯定唔係首選。