股海實戰：光國實力之選

外圍預先炒定全球央行例行年會期間，美國或會宣布推QE3，恒指尋日上試19,800點阻力位，收報19,752點，升285點，但成交只有651億元，真係睇見都唔開胃﹗大價股當細價股炒，繼國壽（02628）前日急跌逾一成，尋日輪到國藥（01099）及聯通（00762）均炒高逾一成，總之大上大落，短炒難度甚高。

「哀莫大於心死」，尋日升市亦無助國壽止跌，股價跌穿20元關，曾低見19.32元，收報19.52元，跌3.84%，成交16.96億元。雖則短線已呈超賣，14天RSI亦見背馳，但中期則尚處下降軌，博反彈宜見好識收。

華創（00291）宣布今年上半年業績，純利同比跌63%，至15.69億元，但若撇除特殊項目，核心業務綜合純利實際同比增長18.2%，營業額同比增長28%至532億元，表現唔係表面睇咁差，但股價仍要捱沽，插過落28.6元，但收市僅跌1.1%，收報30.55元，一如阿莊所料，大戶借人心虛怯乘機震倉，見到「筍價」，遂以均價28.85元買入兩萬股。

繼續睇業績股，積極拓展環保業務嘅光大國際（00257）亦公布咗中期業績，營業額同比增長91%，至18.34億元，純利增43%至3.51億元，每股盈利9.61仙，派中期息每股2仙。

環保業務上軌道

呢幾年話搞環保業務嘅二、三線股甚多，但已成功構建盈利基礎，盈利按年增長兼有息派嘅實力股就唔多，光國係其中一隻。睇番期內公司嘅環保能源項目仍為主要經營溢利來源，增長亦最快，至於環保水務項目貢獻相對穩定。除內地市場外，公司成功投資德國光伏發電項目，進軍海外市場，難怪公布業績後股價有得升，尋日以全日高位2.69元收市，升幅7.6%，成交4,507萬元。

純睇業務發展及盈利表現，隻股現價估值唔係貴。至於圖表走勢，自四月跌穿50日線後，未曾成功重返其上，短線反彈亦以50日線2.87元為主要阻力位，下一較大支持區喺2至2.2元水平。