馬鞍山靚舖搶貴11倍

年前港鐵馬鞍山線通車之後,唔少外區客都多咗入嚟睇樓,代理行更不惜工本喺區內「插旗」,置業18早前就入標搶贏馬鞍山新港城4期一個「龍頭舖」,每月租金近50萬元,比之前時裝店租金高超過十一倍。另外,一線街舖買少見少,投資者高搶二線靚舖,好似觀塘康寧道23號一個500方呎地舖,成交呎價超過11萬多元,逼近旺區一線舖做價。

近幾年不斷擴軍嘅中型代理行置業18,尋日就喺新港城四期開新舖,集團主席張肇栓邀請劉Sir到場,話只要係靚位,畀多少少租金都絕對值得;佢仲透露,尋日開張嘅新港城4期2232至2233號舖,面積約1,100方呎,之前時裝店每月租金只係大約3、4萬元左右。

樓市回復要等明春

不過,早前業主恒地就話可以入標洽租,張老闆話公司咪即刻同伙記落去現場睇睇,發現個舖啱啱喺連接馬鞍山廣場嘅人行天橋附近,仲大讚人流極旺,一、兩日間就拍板入標競投,最終成功奪標,將打造成烏溪沙旗艦店,佢話個區愈來愈旺,有生意做的話,租金多少唔係問題。

樓市呆滯,張老闆話,上個月公司盤數見紅,希望今個月收支平衡,樓市可能要等到出年農曆年後至回復正常。

觀塘舖價逼核心區

不過,佢話樓市逆轉,每每就係擴充嘅好時機,所以集團下季會投放2,000萬元,喺內地同香港開10多間分行,仲會請多兩、三百人;而內地就計劃喺內蒙古嘅呼和浩特開新點。

萊坊有報告講,觀塘康寧道23號仁安大廈一個地舖,獲投資者5,600萬元買入,呎價超過11.2萬元,同核心區差唔多,反映區內舖位獲先搶為快。

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!

置業18主席張肇栓(左四)指出,新舖連接馬鞍山廣場行人天橋附近,人流極旺,就算多付租金也值得。