魚缸Blogger：金蝶逆市呈強有理
雖然市場憧憬今個禮拜五美聯儲局年會後，或會公布QE3細節，但當日美英兩國亦會公布次季GDP嘅修訂數字，何況恒指萬九關已岌岌可危，故投資者暫宜以保守為主，免得贏粒糖輸間廠。
金蝶國際（00268）主要喺內地提供電子商務軟件同企業管理服務，近五年除咗○九年外，集團盈利都能保持逾三成增長，而最近公布嘅中期盈利亦增長43%，至1.27億元人民幣。
儘管金蝶近日股價走勢轉弱，但喺上周五大跌市中逆市呈強，加上消息指「十二五」軟件規劃將喺九月出台，料能為股價帶來支持，若守穩3元關，向上料3.5元為首站阻力，而支持位則會喺2.8元。
金蝶國際（00268）
阻力位：3.5元
支持位：2.8元